Azərbaycanlı qrossmeyster Şəhriyar Məmmədyarovu cari dünya reytinqində ilk "onluq"dan cəmi 0,1 xal ayırır. Hər gün yenilənən dünya reytinqində Məmmədyarov 2744,9 xalla 11-ci pillədə qərarlaşıb.

Bu göstərici 10-cu yerdə olan amerikalı Uesli Sodan 0,1 xal azdı. Vəziyyət avqustun sonuna kimi davam edərsə, Məmmədyarov Sonu FİDE reytinqinin ilk "10-luğ"undan kənarlaşdıra bilər. Fakt budu ki, beynəlxalq federasiya şahmatçının xeyrinə olaraq, reytinqləri tam rəqəmlərə yuvarlayır. Şəhriyar son bir aydakı fəallığına görə amerikalı rəqibini qabaqlayacaq. Azərbaycanlı qrossmeysterdən fərqli So son vaxtlar heç bir rəsmi oyun keçirməyib.

Xatırladaq ki, Şəhriyar sonuncu dəfə FİDE reytinqinin ilk "10-luğ"una 2022-ci ilin sentyabrında daxil olub. Daha sonra onun reytinqi 2757 bala çatıb.

Hazırda dünya reytinqinin ilk "10-luğ"u belədi:
1. Maqnus Karlsen (Norveç, 2839,0)
2. Hikaru Nakamura (ABŞ, 2807.0)
3. Fabiano Karuana (ABŞ, 2784,0)
4. Arcun Eriqaysi (Hindistan, 2782,6)
5. Rameşbabu Praqnanandha (Hindistan, 2779,0)
6. Qukeş Dommaracu (Hindistan, 2776,0)
7. Nodirbek Abdusattorov (Özbəkistan, 2771,0)
8. Alireza Firuzca (Fransa, 2766,0)
9. Vey İ (Çin, 2753,0)
10. Uesli So (ABŞ, 2745.0)