“France Football” 2025-ci il üçün “Qızıl top” mükafatına namizədlərin siyahısını açıqlayıb. Siyahıya 30 futbolçu salınıb.

Diqqəti cəlb edən əsas fakt “İnter Mayami”nin ulduz futbolçusu Lionel Messi ilə “Əl-Nəssr”in daha bir dünya şöhrətli hücumçusu Kriştiano Ronaldonun Fransa jurnalının açıqladığı siyahıda yer almamasıdı.

Onlar artıq ikinci ildi futbolun ən nüfuzlu fərdi mükafatlarından biri uğrunda mübarizə aparacaq oyunçuların sırarasında görünmürlər. Halbuki argentinalı Messi “Qızıl top”u rekord sayda - 8 dəfə qazanıb, portuqaliyalı Ronaldo isə bu mükafata 5 dəfə sahib olub.

Qeyd edək ki, bu il üçün “Qızıl top”un təqdimat mərasimi sentyabrın 22-də Parisdə keçiriləcək. Ötən il mükafatı “Mançester Siti”nin ispaniyalı yarımmüdafiəçisi Rodri qazanıb.

“France Football” həftəliyi “Kopa Trophy” mükafatına namizədlərin adını da açıqlayıb. Mükafata bu oyunçular namizəddi: Pau Kubarsi (Barselona), Ayub Buhaddi (Lill), Dezire Due (PSJ), Estevao (Çelsi), Dean Huysen (Real), Miles Luis-Skelly (Arsenal), Rodriqo Mora (Portu), Joao Neveş (PSJ), Kənan Yıldız (Yuventus). 2024-cü ildə İspaniya millisi ilə AÇ-2024-ün qalibi olan “Barselona”nın vingeri Lamin Yamal ən yaxşı gənc oyunçu seçilib.

“France Football” 2025-ci il üçün kişilər arasında ən yaxşı futbol məşqçisi adına namizədlərin adını da açıqlayıb. Mükafata 5 namizəd göstərilib. Onlar Antonio Konte (Napoli), Luis Enrike (PSJ), Hans-Diter Flik (Barselona), Entso Mareska (Çelsi) və Arne Slotdu (Liverpul). Xatırladaq ki, 2024-cü ildə “Real”a rəhbərlik edən Karlo Ançelotti dünyanın ən yaxşı məşqçisi seçilib.