Doğrudan da, həyatda bəxt yaxşı şeydi. İşinin yaxşı getməsini, hədəfinə çatmağı istəyirsənsə, öz canfəşanlığından, fədakarlığından, əziyyətindən başqa uğur da üzünə gülməlidi, xoşbəxt ulduz altında doğulmalısan, yoluna mərdimazar çıxmamalıdı.

...1998-ci il dekabrın 4-də İrlandiyanın Ennis şəhərində dünyaya gələn Barri Kotter ad-soyadlı futbolçu var. Görünür, valideynləri ona zamanında yaxşı tərbiyə verməyib. Versəydilər, heç bir ehtiyac olmadan kobudluğa əl atmağın yaxşı əməl sayılmadığını anladardılar. Həmin bu Barrinin şərəfini qoruduğu “Notts Kaunti” ötən həftənin şənbə günü “Kayzerslautern”lə yoxlama oyunu keçirib. Almaniya təmsilçisi elə ilk 10 dəqiqədə İngiltərənin 2-ci liqa klubunun qapısından üç qol keçirməklə oyunun taleyini həll edib. Qollardan birini də Mahir Emreli vurub. “Notts Kaunti”nin cəmi 8 gün əvvəl “Barnsli”dən icarə götürdüyü həmin bu irlandiyalı müdafiəçi hissənin sonunda bütün acığını həmvətənimizdən çıxıb – topla irəliləyən Mahiri hədsiz sərt fəndlə yerə sərib.

Futbol oynayanlar yaxşı bilir, topla hərəkətdə olan futbolçunu arxadan badalaqla yerə sərəndə həm zədə ehtimalı artır, həm də belə hərəkət zərər çəkən şəxsi özündən çıxarır. Mahir də eynən məhlə gəncləri kimi yıxılandan dərhal sonra ayağa qalxdı, elə meydandaca Barri ilə münasibətləri aydınlaşdırmağa çalışdı. İnsafən, komanda yoldaşları da azərbaycanlının tərəfini tutdu və bunun üçün bütün əsaslar var idi. 0:3 uduzsan da belə, bu adi bir yoxlama oyunudu, hansısa titulun, kubokun taleyi həll olunmur ki... Belədə rəqib futbolçuya qarşı ifrat kobudluğun adı yalnız və yalnız qəsdən xətər yetirmək cəhdidi.

Nəticə nə oldu? Barri qırmızı vərəqə ilə qovuldu, Mahir zədə üzündən meydandan çıxmalı oldu, “Notts Kaunti” də 0:4 uduzdu. Barrinin canı cəhənnəmə, 26 yaşında İngiltərənin səviyyəcə 4-cü liqasında oynamağa razılıq veribsə, deməli, elə maksimumu budu. Amma olan Mahirə oldu. Adam “Kayzerslautern”in heyətində möhkəmlənməyə, bu komandanın lideri olmağa, “böyük beşlik” ölkəsinin elitasında oynamağa can atır. İndi isə ən azı bir həftə gözləməyə, ağrılardan qurtulandan sonra məşqə qatılmağa məcburdu. Bax, zahirən adi, heç nəyi həll etməyən oyun epizodu idi. Amma bir sarsaq müdafiəçi qəfil nə düşündüsə, Mahiri badalaqla yerə sərmək fikrinə düşdü.

İndi bu yazının sərlövhəsindəki mənanı tutduzmu? Həqiqətən də mərdimazar olmasa, bağ çəpəri neyləyər...

ORXAN