İngiltərə nəhəngi “Mançester Yunayted”lə bağlı yeni xəbərlər var. Belə ki, Markus Reşford, Antoni, Alexandro Qarnaço, Ceydon Sanço və Tirell Malasiya klubdan ayrılmaq niyyətindədi.

Bu 5 futbolçu rəhbərliyə bununla bağlı məlumat verib. Bu xəbəri tanınmış insayder Fabritsio Romano paylaşıb.

Qeyd edək ki, bu 5 futbolçudan dördü onsuz da ötən mövsümü “Yunayted”də başa vurmamışdı. Sanço mövsümü “Çelsi”də, Reşford “Aston Villa”da, Antoni “Betis”də, Malasiya isə PSV-də tamamlamışdı. Bu oyunçulardan yalnız Qarnaço komandada idi. O da Avropa Liqasının finalında start heyətinə düşməyəndən sonra baş məşqçi Ruben Amorimdən narazılığını dilə gətirmişdi.

Reşfordun Mançesterdə qalmayacağı, demək olar, dəqiqdi. Çünki rəhbərliyin qərarı ilə ona məxsus “10” nömrəli forma yeni transfer Mateus Kunyaya verilib. Reşfordun “Barselona”ya yollanmaq ehtimalı var. İngiltərə mətbuatının xəbərinə görə, “Yunayted” “Aston Villa”nın və İngiltərə yığmasının forvardı Olli Uotkinsi transfer etmək istəyir. Ancaq mankunianlar qarşı tərəfin tələb etdiyi 60 milyon funt sterlinqi ödəmək istəmir. “Yunayted” bir müddət öncə Reşfordla Uotkinsi dəyişməyi təklif etsə də, birmingemlilər buna razılıq verməmişdi.

Digər tərəfdən Uotkins özü də Mançesterə yollanmağa tərəddüd edir. Çünki bu klub ötən mövsümü 15-ci yerdə başa vurdu və avrokuboklardan kənarda qaldı.