Nüfuzlu insayder Fabritsio Romano fevralın 1-də Markus Reşfordun “Aston Villa”ya icarəyə verilməsi ilə bağlı sövdələşmənin tezliklə başa çatacağını xəbər verib.

Ertəsi bu xəbər rəsmi şəkildə təsdiqləndi. Beləliklə, dekabrın ortalarından “Mançester Yunayted”in oyunlarında sifariş ərizəsinə düşməyən ingiltərəli hücumçu növbəti yarım ili Birmingemdə keçirəcək.

Komandalar yarımillik icarəni razılaşdırsa da, maliyyə incəlikləri ilə bağlı detallı informasiya yoxdu. Bir müddət əvvəl insayder xəbər vermişdi ki, “şirlər” Markusun 300 min funt sterlinq təşkil edən həftəlik maaşının bir hissəsini ödəyəcək. İngiltərə premyer-liqasında ondan daha çox qazanan 5 futbolçu var. “Aston Villa”nın sonradan futbolçunun transfer hüququnu ələ keçirməsi imkanı da müzakirə olunur.

İngiltərə yığmasından 60 oyun keçirən Reşfordun qərarında həlledici rolu Çempionlar Liqasında çıxış etmək perspektivi oynayıb. Bildiyiniz kimi, “Aston Villa” 1/8 finala vəsiqə qazanan komandalar sırasındadı. Futbolçu artıq birmingemlilərin baş məşqçisi Unay Emeri ilə də danışıb. “Şirlər” premyer-liqada da yaxşı təsir bağışlayır: 8-ci yerdə qərarlaşmaqla 4-cü pillədəki MS-dən 4 xal geri qalırlar.

“Aston Villa” bu “transfer pəncərəsi”ndə Reşford üçün yeganə varian deyildi. Bəzi qaynaqlar onun “Barselona”ya keçidinin mümkünlüyündən yazırdı, ancaq bunun üçün katalonoyalılar iki futbolçusunu satmalıydı. “The Guardian” isə futbolçunun “Tottenhem”in təklifindən imtina etdiyini bildirir.

Markus son ayyarımda MY-nin oyunlarında görünməyib. O, sonuncu dəfə dekabrın 12-də Avropa Liqası çərçivəsində keçirilən “Viktoriya” ilə oyunda meydanda olub. Forvard “Old Trafford”a noyabrda qədəm qoyan yeni baş məşqçi Ruben Amorimlə münasibətləri heç cür nizama sala bilmədi.

Portuqaliyalı mütəxəssis hətta 23-cü turda “Fulhem” üzərindəki qələbədən sonra demişdi ki, 63 yaşlı qapıçılar üzrə məşqçi Jorje Vitalı sifariş ərizəsinə salar, nəinki hər gün can qoymayan futbolçunu.

Yetərincə fədakarlıq etməmək – Amorimin Reşforda əsas iradı məhz bundan ibarətdi. Futbolçu ilə baş məşqçi son vaxtlar hətta gündəlik təması da dayandırçışdı. Amorim “Mançester Siti” üzərindəki qələbədən sonra Reşfordla Qarnaço haqda belə demişdi: “Yaxşı məşq edərlərsə, onlar da növbəti həftələrdə başqaları kimi olarlar. Ya oynaycaqlar, ya da ehtiyat oyunçular skamyasında oturacaqlar. Bu, intizam cəzası deyil. Meydanda və ondan kənarda standartlarımızı yüksəltməliyik”.
Reşfordu MY-də “Bavariya”nın 19 yaşlı oyunçusu Matis Telin əvəz etməsi ehtimalı daha böyükdü. Fransalı özü də yetərincə oyun vaxtı qazanmadığı Münheni tərk etməklə maraqlıdı. Cari mövsümdə bütün turnirlərdə 14 oyun keçirən Matis hələ bir qol da vurmayıb.

Reşford isə 24 oyunda 7 qolla yadda qalıb. MY-nin yetirməsi olan Markus bu komandanın heyətində 400-dən çox oyun keçirib, 138 qol vurub. Avropa Liqasının, ölkə və Liqa kubokunun qalibi olub.