Elitada qalmaq uğrunda oynamağa “öyrəşən” “Kəpəz”in, belə çıxır ki, yeni mövsümdə də “hədəfi” eyni olacaq.

Yeni rəhbərliyin gəlişi hələ ki problemləri həll etməyib. Rəsmən legioner soyqırımı gedir. Ümumilikdə komandadan 11 futbolçu ayrılıb ki, bunlarln yeddisi – Yeqor Xvalko, Trent Buhagyar, Rati Ardazişvili, Kərim Lkoça, Dioqo Verdaşka, Rojerio Santos, Valdemar Almeyda legionerdi.

Deyəsən, “Kəpəz” rəhbərliyi legioner limitinin ləğvini səhv başa düşüb. Hələ ki cəmi iki futbolçu ilə yeni müqavilə imzalanıb. Mahamadu Ba və Paçu Lira ilə ikiillik müqavilə bağlanıb. Keyfiyyətli, komandaya xeyir verə biləcək futbolçular göndəriləndən sonra hansı hədəflər uğrunda oynayacaqlar? Futbolçuları dəqiq Adil Şükürov istəmir? Komandanın hədəfləri dəyişibsə, yeni transferlər hanı? Yaxın günlərdə açıqlanacaq? Bəs yenilərin bir-birinə uyğunlaşması, Adil Şükürovun fəlsəfəsini yeni futbolçulara aşılaması? Hamısı vaxt aparmayacaqmı?

Gəncəli azarkeşlər iddialı “Kəpəz” görməyə acdı. Onlar maliyyəsi normal səviyyədə olan klub görmək istəyirlər ki, bir neçə mövsüm sonra çempionluq uğrunda oynamaq da gerçəkləşsin. Verdaşkanın ayrılması rəsmən açıqlanmamış Adil bəylə söhbətimiz oldu. Maliyyə məsələlərində anlaşa bilmədikləri üçün Verdaşkanın komandadan getdiyini dedi. Aydın məsələdi ki, klubun bəlli büdcəsi var.

Düzdü, klubun içində deyilik, nələr danışıldığından xəbərdar deyilik. Amma Verdaşkanın, yaxud digər futbolçuların kosmik məbləğ istədiyi də inandırıcı görünmür. Bir sözlə, “Kəpəz” iddialı olmaq istəyirsə, kisənin ağzını açmalıdı.

MÜZƏFFƏR QULUZADƏ