"Araz-Naxçıvan"ın Konfrans Liqasının 2-ci təsnifat mərhələsindəki rəqibi "Aris" heyətini gücləndirib.

"Football-plus.az"ın məlumatına görə, Yunanıstan təmsilçisi qapıçı transfer edib. Söhbət Georgios Atanasiadisdən gedir. 32 yaşlı "əlcək sahibi"ylə birillik müqavilə imzalanıb.

Qolkiperin sonuncu klubu AEK-di. O, 2024/25 mövsümündə Cənubi Kipr klubunun heyətində 26 matçda meydana çıxıb. Bu oyunların 12-də qapısını toxunulmaz saxlayan futbolçu qalan görüşlərdə 21 qol buraxıb.

"Transfermarkt"da qapıçının bazar dəyəri 800 min avrodu. Böyük ehtimalla, Saloniki təmsilçisinin baş məşqçisi Marinos Uzunidis "Araz-Naxçıvan"la oyunlarda qapıçı mövqeyində ya Atanasiadisin, ya da həm də komandanın kapitanı olan 34 yaşlı Yulian Cuestanın xidmətindən faydalanacaq. Ona görə ki, digər qolkiper Konstantinos Kiriazisin cəmi 21 yaşı var.

Bu arada "Aris"in təlim-məşq toplanışı çərçivəsində keçirəcəyi yoxlama oyunlarında hansı komandalarla qarşılaşacağı bəllidi. “Aris” iyulun 3-də "Livinqston"la (Şotlandiya), 5-də "Anderlext"lə (Belçika), 9-da isə "Alkmaar"la (Niderland) üz-üzə gələcək.

Xatırladaq ki, "Araz-Naxçıvan" "Aris"lə iyulun 24-də evdə, 31-də səfərdə qarşılaşacaq.

KƏNAN BAHADIR