Düzü, bu yazını srağagün – “İmişli” portuqaliyalı Xorxe Kaskilyanı baş məşqçi vəzifəsinə təyin edəndə qələmə almaq fikrində idim. Lakin baş redaktorumuz Mahir Rüstəmli bu sözlərlə məni fikrimdən daşındırdı:

Odu ki, həmin gündən bəri Aqşin bəyə mesaj yazdım, zəng etdim. Lakin funksioner nə dəstəyi qaldırdı, nə də mesajları cavabladı. Başqa əməkdaşlarımızdan birinə isə dünən günorta saatlarında cavabını axşam təqdim edəcəyini dedisə, vaxt-vədə yetişəndə yenə “qeybə çəkildi”. Qısası, təkcə “İmişli” azarkeşlərinin yox, həm də futbol ictimaiyyətinin böyük hissəsinin yanlış addım saydığı qərarı qınamasına baxmayaraq, məsələyə aydınlıq gətirməkdən üz çevirdi...

Oxucularımızı Kaskilyanın dosyesi ilə tanış etmişik. Artıq bilirik ki, portuqaliyalı karyerası ərzində ciddi uğur qazanmayıb. Bu üzdən “İmişli”nin premyer-liqada böyük çətinliklərlə üzləşəcəyinə şübhə yoxdu. Bəs tərəfdar dəstəyi? Komanda ev oyunlarını Ağsu şəhər stadionunda keçirəcək. Bəs maliyyə gücü? Bu sualın cavabı klubun sponsoru olan RDC MMC-də gizlidi. Məlum olduğu kimi, adı çəkilən şirkət konsaltinq xidmətiylə məşğuldu. Yəni hansısa müəssisə üçün gələcək planların proqnozlaşdırılması, strategiyaların hazırlanması, problemlərin aşkar edilməsi və həll yolunun təqdim edilməsi kimi xidmətlər göstərir.

Görünür, buna ilk növbədə məhz “İmişli”nin ehtiyacı var. O başqa məsələ ki, RDC MMC pullarının havaya sovrulmasından məmnun görünür. Bəlkə elə ilk növbədə onlar bu qərarla razılaşmamalıydı. Azı ona görə ki, ölkəmizdə xeyli yerli, təcrübəli, ancaq işsiz qalan məşqçilərlə anlaşmaq mümkün idi.

Qayıdaq Aqşin Mürsəlova... İnsafən, funskioner portuqaliyalı baş məşqçi məsələsindən başqa bütün mövzularla bağlı müraciətlərimizi cavablayıb və imkan daxilində ətraflı məlumat verməyə çalışıb. Bu üzdən məhz bu məsələylə bağlı yuxarıda bəhs etdiyim davranışına izah tapmaqda çətinlik çəkdim. Bəlkə də hansısa dəlili var. Ancaq hər kəsə bəllidi: susmaq razılıq əlamətidi! Belədə dünya tarixinin ən nəhəng imperiyasının banisi, monqol hökmdarı Çingiz xanın məşhur ifadəsi ağla gəlir:
Allah “İmişli”ni sonrakı, başqa sözlə, fayda verməyən peşmanlıqdan qorusun!

KƏNAN BAHADIR