Son mövsümü 8-ci yerdə bitirən “Sumqayıt”a nə yeni baş məşqçi gəlib, nə də yeni futbolçular.

Komanda rəsmi şəkildə üç futbolçu ilə yollarını ayırıb. Bunlar Miloş Miloviç, Momo Yansane və Rövlan Muradovdu. Daha beş futbolçunun - Cəsurbek Caloliddinov, Bobir Abduxalikov, Elvin Bədəlov, Murad Xaçayev və Cordan Rezabalının getmək ehtimalları ilə bağlı xəbərlərin intensivliyi artıb. Hətta Elvinlə Muradın “Neftçi” ilə anlaşdığı, qarşıdakı günlərdə bu keçirdlərin açıqlanacağı deyilir.

Özbək futbolçuların - Cəsurbeklə Bobirin komandada qalacağı böyük sualdı. Klubun mətbuat katibi Zaur Xudiyevlə əlaqə saxladıq, o bu yöndə hələ ki dəqiq bilgi olmadığını dedi. Murad Xaçayev bu mövsüm çempionatda 35, Elvin Bədəlov isə 33 oyuna çıxıb. Komandanın etibarlı dayaq sütunlarıdı. Legioner limitinin ləğvi bütün yerli futbolçularla yolları ayırmaq demək deyil. Cəsurbek komandaya oktyabrda qoşuldu, 15 oyuna çıxdı. Bu 15 oyunda cəmi bir məhsuldar ötürmə ilə yadda qalıb. Bobir isə komandaya qışda gəlsə də, ən yaxşılardan birinə çevrildi. Belə ki 13 oyuna çıxan 28 yaşlı hücumçu dörd qol, üç məhsuldar ötürmə ilə yadda qaldı, komandaya vacib xal və xallar qazandırdı. Bobirin getməmək ehtimalı varsa, mütləq saxlanılmalıdı.

Baş məşqçi yoxdu deyə, təlim-məşq toplanışı ilə bağlı da dəqiq heç nə deyilmir. Bu komandanın axırı nə olacaq?! İki mövsüm əvvəl avrokuboklara çıxan komanda ardıcıl ikinci mövsüm elitada qalmaq uğrunda oynayacaq? Belə gedişlə hər şey buna doğru gedir. Yeni stadion, nəticə görəndə stadionu dolduran azarkeş - hər şey var. Amma klub hələ də hədəflərinə uyğun baş məşqçi tapa bilmir. Çox güman, Riad Rəfiyevin başını mümkün legioner baş məşqçilər gicəlləndirir. Yoxsa Azərbaycanda işsiz olan çoxlu mütəxəssis var. İlk ağla gələn də yaxınlarda işsiz qalan Azər Bağırovdu. Tərlan Əhmədov, Azər Məmmədov kimi bir neçə “coker” baş məşqçi var ki, “Sumqayıt”ı bataqlığa düşməkdən xilas edə bilərlər. Azərbaycana gələn əcnəbi baş məşqçilərin mütləq əksəriyyəti uğurlu olmayıb. “Sumqayıt” özü də bu bəlaya düşüb. Aleksey Baqa ilə komanda nəinki qələbə qazana, heç qol da vura bilmirdi.

Bir sözlə, “kimyaçılar” təcrübəli yerli məşqçi tapıb yaxşı transfer etməklə uçurumdan qaçmalıdı. “Qəbələ” kimi komanda elitanı tərk edibsə, “Sumqayıt” üçün də belə aqibət qaçılmaz ola bilər.

MÜZƏFFƏR QULUZADƏ