“Kimin performansı nə idisə, qərarlaşdığı mövqe də ona uyğundu. “Sabah” və “Neftçi” mövsümə medallar uğrunda mübarizə apara biləcək komandalar kimi başlamışdı. Bu iki komanda yuxarı yerlər uğrunda mübarizə aparmalıydı. Digər kollektivlər üçün təəccüblü bir şey görünmədi. “Qarabağ” müzakirə mövzusu deyil. Onlar başqa komandalardan qat-qat üstündü. Hər kəs öz mövqeyini tutdu. Dörd komandadan biri çempionatı tərk edə bilərdi. “Kəpəz” də ağır durumda idi. “Şamaxı” bir dövr oldu ki, çətin vəziyyətə düşdü. “Sumqayıt”da da işlər yaxşı deyildi. Aralarında ən zəif “Səbail” oldu. “Qarabağ” istisna olmaqla, digər komandalara qarşı çempionat rəqabətli keçdi. Zirvədə xal fərqinin böyük olması qeyri-sabitliyin göstəricisidi. Birinci mövqedə qərarlaşan komanda ilə mübarizə aparmaq çətindi. Maliyyə və təcrübə böyük rol oynayır. İnsanlar bir qapıçıya milyon verib ala bilirsə, digər komandaların bu qədər pul xərcləmək imkanı yoxdu. “Qarabağ”la “Zirə”nin arasındakı xal fərqi normaldı. “Qarabağ”la rəqabət aparmaq hazırda çox çətindi. “Zirə” heyətini çox yaxşı komplektləşdirmişdi. Hansısa bir oyunçu zədələnirsə, onun kimi futbolçu ilə əvəz etməyi bacarmışdı. “Araz-Naxçıvan” bir müddət çox yaxşı çıxış etdi. Sonra bəzi zədəli futbolçuları əvəz edən tapılmadı. Belədə bir neçə oyunda məğlub oldular. Bu xal itkiləri onları “Zirə”dən uzaqlaşdırdı. Çempionata rəqabətsiz deməzdim. Təcrübə və maliyyə durumu komandanı qabağa aparır. “Səbail” belə “Qarabağ”la oyunda qol vəziyyətləri yaradırdı. Rəqabət var, heyətlə bağlı səbəblərdən rəqiblər bir-birindən fərqlənirlər. “Turan Tovuz” da bir neçə oyunçusunu itirdi. Dominant çıxış edən kollektiv deyildi. “Turan Tovuz” turnir cədvəlində özündən aşağıda qərarlaşan komandalara qarşı hücum futbolu oynadı. Çatışmazlıqlardan biri də müdafiəyə qayıdan zaman səhvlərə yol vermək idi. Məğlub olduqları matçların əksəriyyətində əks-hücumda yaxalanır, qollar buraxırdılar. Bu durum medallar uğrunda mübarizədə tovuzluları geri atdı. “Neftçi”nin elə transferləri var idi ki, böyük səhvlərə yol verirdilər. Oyun baxımdan deyə bilmərəm ki, “Araz-Naxçıvan”a tam uduzdular. Bakılılar kobud səhvlər nəticəsində məğlub duruma düşürdülər. “Sabah” bəlli bir mövqelərdə özünü doğrultmadı. Sonda çempionatda layiq olmayan yerdədi. Titul qazanmaqdan ötrü son şansı qalıb. Hər halda, çempionatda gözləntilərin aşağısında çıxış etdi”.

“Ölkə çempionatında son iki-üç ildə artım hiss olunur. Oyunların çox hissəsi yüksək tempdə getmir. Növbəti mövsüm çempionat gərgin mübarizə şəraitində keçəcək. Sürətr daha da artacaq. Bu çempionata maraq o qədər də yüksək səviyyədə olmadı. Sonuncu illərdə olduğu kimi, çempion əvvəldən bəlli idi. “Qarabağ” bəzi oyunlarda çətinlik yaşasa da, çempionatın aşkar favoriti kimi yola davam edir. “Zirə”də sabitik görə bildik. Sabit olmayan komandalar müəyyən problemlərlə üzləşdilər. Bu məsələlər sonuncu oyunlara qədər qaldı. Çempionatı maraqlı edən məqam üç-dörd komandanın sona qədər çempionluq uğrunda mübarizə aparmasıdı. Bu mövsümə 10 ballıq şkala ilə 6 verərdim. Avropada da belə hallar baş verir. Kəskin xal fərqinin olması müəyyən problemlər üzündəndi. Autsayderlərin də haqqını yemək olmaz. Onlar da can qoydular, mübarizə əsnasında xal aldılar”.