"35-ci dəqiqədən sonra matç dəyişdi" - Ayxan Abbasov
U-21 millimizin baş məşqçisi Ayxan Abbasov Belarusa 1:3 hesabı ilə uduzduqları yoxlama oyununu şərh edib.
"Football-plus.az" xəbər verir ki, o, matçdan sonra iştirak etdiyi mətbuat konfransında qarşılaşmanın komandası üçün yaxşı təcrübə olduğunu deyib:
"Əlbəttə, məğlubiyyət məyusedici oldu. Amma belə oyunlar bizim üçün vacibdi. Futbolçularımızın səfərdə azakreşlər qarşısında təzyiqlərlə bacarmalıdı. Rəqibin gücü bəlli idi. Bilirdik ki, rəqib öz meydanında qalibiyyət üçün oynayacaq. İlk 35 dəqiqə demək olar ki, bizdə hər şey alınırdı. Qol da vurduq, epizodlarımız çox oldu. İki qol da vura bilərdik. Amma 35-ci dəqiqədən sonra matç dəyişdi. Raul Məmmədovun zədəsinin də oyuna təsir oldu. Birinci hissənin son 10 dəqiqəsində rəqib üstünlük əldə etdi və oyunçularımızda psixoloji cəhətdən eniş oldu. İkinci hissədə nələrisə dəyişmək, digər oyunçulara şans vermək istədik. Ümumi götürsək, bizim üçün bir sınaq idi, nəticə çıxarmalıyıq. Növbəti oyunlara hazırlaşacağıq, səhvlər üzərində işləyəcəyik. Rəqib birinci hissənin sonunda daha dinamik oynamağa başladı. Ən əsas oyun tempini artırmalıyıq. Beynəlxalq oyunlarda bu vacibdi".
Mütəxəssis hansısa oyunçunu fərqləndirmək istəmədiyini bildirib:
"Birinci hissədə istədiyimiz hücumlar alınırdı. Bunların üzərində işləyirdik. Bir neçə istədiyim tempdən aşağı idi, bu da normaldı. Çünki az oynamışdılar. Amma oyun tempini qaldıra bilsək, gələcəkdə hər şey yaxşı olar. Heç bir futbolçu uduzmaq istəmir, əsasən də gənclərə dəstək olmalıyıq. Matçın ilk 35 dəqiqəsi mənə gələcək üçün böyük ümid verir".
Baş məşqçi Belarus futbolu ilə Azərbaycan futbolu arasındakı fərqdən danışıb:
"Belarusla hərtərəfli dost ölkəyik. Mənim üçün Belarus daha yaxındı. Burada PRO kateqoriyası üçün oxumuşdum. Rəqibin baş məşqçisi ilə bir yerdə oxumuşduq. Onu görməyə şad oldum. Son illərdə uşaq futboluna yaxşı diqqət edirlər. Bu, bizi sevindirir. Bütün yaş qruplarında irəliləyişi görürük. Məşqçiləri ilə də danışdım. İnkişaf istəyiriksə, bizdə bunu etməliyik. Şərait və stadionların keyfiyyəti Belarusda bizdən daha yaxşıdı. Çempionat baxımından isə bizdə daha yüksək keyfiyyat var. Amma millilər cəhətdən Belarus daha yüksəkdi".
O, həm millidə, həm də premyer-liqada oynayan futbolçuların çıxışlarından söz açıb:
"Oyunçunun premyer-liqa təcrübəsi olması hər matçda yaxşı oynayacağını demir. Razıyam, Xəyal bu gün daha yaxşı oynaya bilərdi. Antalyada qalib gəldiyimiz oyunda ən yaxşılardan idi. Əlbəttə, premyer-liqadakı oyunçulardan gözləntilər daha çoxdu. Digərlərindən bir addım qabaqdadılar. Amma bu gün yaxşı şeylər də var idi. Rüfət Abbasov, Edqar Adilxanov və Murad Məmmədov seçilirdilər. Ağadadaş Salyanskinin də yaxşı fürsətləri oldu. İşləmək lazımdı. Bu məğlubiyyətlərdən dərs çıxarmalıyıq. Əks halda heç nə alınmayacaq. Çünki futbolda məğlubiyyət olur".
