''Fənərbaxça'' fanatlarının rəhbərliyə qarşı etirazı davam edir.

"Football-plus.az" xəbər verir ki, şənbə günü fanatların çoxdan planlaşdırdığı etiraz aksiyası baş tutdu.

Kadıköydəki Bağdad küçəsində baş tutan və ''Ülkər stadionu''nun önündə bitən aksiya yerli vaxtla saat 13.00-da başladı. ''Böyük Fənərbaxça Yürüşü'' adı altında keçirilən etiraz aksiyasında minlərlə fanat iştirak etdi. Onlar rəhbərliyin siyasətindən narazılıqlarını dilə gətirərək başqan Əli Koçu istefaya səslədilər, eləcə də bu yöndə çoxlu pankartlar açdılar. Bundan başqa etiraz iştirakçıları rəhbərlikdən tezliklə növbədənkənar prezident seçkilərinin keçirilməsini də tələb etdilər.

Aksiyaya camiənin tanınmış isimləri də dəstək verdi. Onların arasında ''12 numara'', UTG (Untill The Grave), ''Kill For You'', ''Pepe Mətin'' kimi əfsanəvi tribuna liderləri var idi. Bundan başqa klubun sabiq rəsmisi, son dönəmlərdə Əli Koça müxalif olan əsas sima, prezidentliyə namizədliyini açıqlayan Hakan Bilal Kutlualp da aksiyada iştirak etdi.

Polislər tərəfindən ciddi təhlükəsizlik tədbirləri görülsə də, buna ehtiyac qalmadı. Çünki sakit şəraitdə keçən aksiyada heç bir qanqaraldıcı olay yaşanmadı. Sosial şəbəkələrdə də #BüyükFenerbahçeYürüyüşu heşteqi ilə aksiyaya aid çoxsaylı paylaşımlar edildi.