“Baku Fire” bu mövsüm çempionluğa çox yaxın idi. Birinci dövrədə əsas rəqiblərimizi geridə qoyduq, lakin ikinci dövrədə sanki komanda uğursuzluq zolağına düşdü. Dövrələrarası fasilədə əsas rəqibimiz olan “Araz-Naxçıvan” heyətini bir neçə legionerlə gücləndirdi və bu transferlər onların oyununa ciddi təsir göstərdi. Biz də heyətimizi möhkəmləndirməyə çalışdıq, ancaq “Araz-Naxçıvan”la maliyyə baxımından eyni səviyyədə deyilik və bu fərq meydanda da özünü göstərdi. Mövsüm hələ başa çatmasa da, mən bu ili “Baku Fire” üçün ümumilikdə uğurlu saymaq istərdim. Çempionluq uğrunda mübarizədə bir sıra ciddi sınaqlardan keçdik və bu proses komandamız üçün böyük təcrübə oldu. Əsas problemlərdən biri yığma ilə bağlıdı. Bildiyiniz kimi, millinin aparıcı oyunçularının əksəriyyəti “Baku Fire”ın üzvüdü. Hər təlim-məşq toplanışı zamanı əsas heyətin 6-7 üzvü komandadan ayrı qalır. Biz isə həmin vaxt cəmi 4-5 əsas oyunçu və “Baku Fire-2”dən dəvət olunan gənclər ilə məşq keçməyə məcbur oluruq. “Araz-Naxçıvan” isə hazırlıq prosesini tam heyətlə, xüsusən də 8 legioneri ilə birlikdə keçir. Digər bir problem ikinci dövrədə qol imkanlarımızdan istifadə edə bilməməyimiz oldu. Sanki komanda hücumda tilsimə düşmüşdü. Üstəlik “Araz-Naxçıvan”la 3-cü oyunda hakimlərin yol verdiyi kobud səhv bizə baha başa gəldi. Həmin qarşılaşma komandamızın bu mövsüm göstərdiyi ən yaxşı oyunlardan biri idi və qələbəyə biz daha layiq idik. Ümumiyyətlə, bu mövsüm “Araz”la keçirdiyimiz oyunlarda “Baku Fire” daha üstün futbol sərgiləyib. Mövsüm hələ bitməyib. Mayın 29-da “Neftçi”yə qarşı son oyunumuz var və bütün diqqətimizi həmin matça yönəltmişik. Bu ilin daha bir sevindirici tərəfi isə “Baku Fire-2”nin 1-ci liqada çempion olmasıdı”.