AFFA Region Liqasında 2024/25-ci illər mövsümünün qalibi bəlli olub.

"Football-plus.az" xəbər verir ki, Qəbələ şəhər stadionunda keçirilən final oyununda “Şirvan” və “Xankəndi” qarşılaşıb.

Rəqibinə 3:0 hesabı ilə qalib gələn “Xankəndi” çempion olub və 2-ci liqada iştirak hüququ əldə edib. Komanda növbəti mövsüm Region Kubokunda ölkəmizi təmsil edəcək. “Şirvan” isə 2ci liqaya vəsiqə uğrunda pley-off oyunu keçirəcək.

3-cü yer uğrunda qarşılaşmada “Ağstafa Gəncləri” “Göyəzən”i 5:2 hesabı ilə məğlub edib və bürünc medal qazanıb.

Oyunlardan sonra mükafatlandırma mərasimi təşkil edilib. 20 qol vuran “Şirvan”ın oyunçusu Cavid Nəcizadə bombardirə təqdim olunan mükafata yiyələnib. “Xankəndi”dən isə Sərxan Ağayev Region Liqasında mövsümün ən yaxşı futbolçusu adına layiq görülüb.

Nəhayət, “Ağstafa Gəncləri” bürünc, “Şirvan” gümüş medalla, “Xankəndi” isə qızıl medal və kubokla təltif olunub. Komandalara mükafatları AFFA-nın icraçı vitse-prezidenti Sərxan Hacıyev, Regional Futbol Federasiyasının prezidenti İsgəndər Cavadov və millimizin direktoru İlqar Qurbanov təqdim edib.