Səbail – Zirə 0:1 (0:0)
12. Əlirza Müştəbazadə - 5,5
22. Mirabdulla Abbasov – 5,0
(77. Fərid Nəbiyev, 60) – 5,0
96. İlkin Muradov – 5,5
20. Mərt Çəlik – 5,5
11. Rüfət Abdullazadə - 6,0
83. Nihad Quliyev – 5,5
(5. Gitay Sofir, 67) – 5,0
16. Emin Rüstəmov – 5,5
10. David Qomis (k) – 5,5
(67. Rəvan Abasov, 83) – qiymətsiz
3. Dmitri Litvin – 5,0
7. Madi Queta – 5,5
(18. Süleyman Əhmədov, 83) – qiymətsiz
14. Suleyman Alluş – 5,5
Ehtiyat oyunçular
1. Hüseynəli Quliyev
25. Nicat Məmmədzadə
74. Yusif Nəbiyev
88. Hacıəli Şirəliyev
44. Amir Bilali
99. İnnosent Nşuti
4. Marko Nikoliç
Baş məşqçi: Əbdülqəni Nurməmmədov
Komandanın ən yaxşısı: Rüfət Abdullazadə

41. Anar Nəzirov (k) – 6,5
7. Məqsəd İsayev – 6,0
14. Elçin Əlicanov – 6,0
11. Rüstəm Əhmədzadə - 6,0
(18. Martins Junior, 68) – 5,5
5. Stefan Aka – 5,5
(70. İssa Cibrila, 79) – qiymətsiz
90. Davit Volkov – 7,0
10. Giorgi Papunaşvili – 6,0
(48. Ramiz Muradov, 90+2) – qiymətsiz
30. Rikardo Martins – 5,5
(29. Ceyhun Nuriyev, 68) – 5,0
3. Ange Mutsinzi – 5,5
6. Eldar Quliyev – 6,0
(17. Ayron Qomis, 68) – 5,0
19. Salifu Suma – 6,0
Ehtiyat oyunçular
13. Aydın Bayramov
99. Səlim Həşimov
53. Şahmar Aşurov
91. Murad Ələkbərov
43. Əhliman Süleymanzadə
4. Ruan Renato
Baş məşqçi: Rəşad Sadıqov
Komandanın ən yaxşısı: Davit Volkov

Qol: D.Volkov, 90+1.
Vərəqələr: M.Çəlik, 8 (qeyri-idman hərəkəti). D.Qomis, 33 (hakimin qərarına etiraz). E.Quliyev, 33 (qeyri-idman hərəkəti). C.Nuriyev, 72 (qeyri-idman hərəkəti) – sarı.
Hakimlər: TURAL QURBANOV, Asiman Əzizli, Kərim Zeynalov, Elvin Bayramov (hamısı Bakı).
VAR hakimi: Kamal Umudlu (Bakı).
VAR hakiminin köməkçisi: Elşad Abdullayev (Bakı).
Hakim-inspektor: Ömər Paşayev (Bakı).
AFFA nümayəndəsi: Azər Əsgərov (Bakı).
10 may. Bakı. “ASCO Arena”. 700 tamaşaçı (3200 yerlik).
Birinci hissəyə 1, ikinci hissəyə 5 dəqiqə əlavə olunub.
Oyunun qiyməti: 5,5.

“Səbail”in premyer-liqanı tərk edəcəyinə şübhə qalmamışdı. “Zirə” ilə matçda, sadəcə, kağız üzərində görünən şansdan maksimum istifadə etmək lazım idi. Ona görə ki, “Kəpəz” “Sumqayıt”la matçda qalib gəlməklə məsələyə son qoya bilərdi.

Düzü, Bayıl təmsilçisi əvvəlki oyunlarda olduğu kimi, iddialı rəqibə qarşı da cəsarətli çıxış etdi. Ancaq meydan sahiblərinin hədəfə çatması üçün nə istək yetərli oldu, nə də əzmkarlıq. Fürsətləri sağa-sola xərcləyən “dənizçilər” acı taledən qaça bilmədi.
İlk dəqiqələrdə hadisələrin mərkəzdə cərəyan etdiyinin şahidi olduq. Bir-birinin müqavimətini qırmaqda çətinlik çəkən komandalar həm də ehtiyatlı oyun sərgilədi. Nəhayət, 12-ci dəqiqədə təşəbbüsü ələ alan qonaqlar Eldarın simasında hesabı açmağa yaxın olsa da, qeyri-dəqiq zərbə işləri korladı. Ardından meydan sahibləri də eyni aqibətlə üzləşdi – Queta topu “çərçivə”dən keçirməkdə çətinlik çəkdi. Halbuki buna qədər Məqsədlə Eldar səddini uğurla adlayan Rüfət əlverişli mövqedən bəxtini sınayan qvineyalı üçün ideal ötürmə vermişdi.

Queta 16-cı dəqiqədə Rüfətin daha bir ötürməsini puç etdi. Hücumçu bu dəfə Anarla bacarmadı. Çox keçmədən təcrübəli qapıçının növbəti qurtarışını izlədik. 39 yaşlı qapıçı Qomisin “çərçivə”yə ünvanladığı topu uzaqlaşdırdı. 27-ci dəqiqədə isə Əlirza bacarığını sərgilədi. Gənc qolkiper Məqsədin təxminən 25 metr məsafədən yerinə yetirdiyi cərimə zərbəsi zamanı özünü yaxşı tərəfdən göstərdi – sürətlə tirin altına doğru irəliləyən “kürə”ni barmaqlarının ucuyla uzaqlaşdırdı. Ardınca Anarın təcrübəsini danışdırdığı dəqiqələrə şahidlik etdik. O, əvvəl Qomisin, ardından Rüfətin “çərçivə”yə yönəltdiyi topun tora qovuşmasına imkan vermədi.

Göründüyü kimi, “Səbail”in 1-ci hissədə diqtə edən tərəf kimi yadda qaldığını demək üçün əsaslar var. Lakin bu, qonaqların 2-ci yarıda təzyiqi artırmasına və lazım olan qolu vurmasına mane olmadı. Sumanın qapıdan yan keçən zərbəsini nəzərə almasaq, 67-ci dəqiqəyə qədər xüsusi epizod izləmədik. Burda Fəridin, çox keçmədən, Sofirin fərqlənmək cəhdləri qeyri-dəqiqliyin qurbanı oldu. Meydan sahiblərinin 76-cı dəqiqədə vurduğu qol isə sayılmadı. Axı Mərtin ötürməsindən sonra fərqlənən Rüfət oyundankənar vəziyyətdə idi. “Dənizçilər”i 1-ci liqaya yuvarlayan qolun müəllifi Volkov oldu. Əslində, bu Suma da ola bilərdi. Ancaq Əlirza onun uzaqdan qapıya zərbəsini dəf etdi. İş ondadı ki, gürcüstanlı qapıçının yerdə, topun meydanda qalmasından maksimum yararlandı və 90+1-ci dəqiqədə yekun nəticəni müəyyənləşdirdi. Beləliklə, “Zirə” ardıcıl 5-ci qələbəsini qazandı. “Səbail”in isə qorxduğu başına gəldi…

Gözdən qaçmadı
* Elvin Məmmədov hər fürsətdə yaxınlığında olan futbolçuları yanına çağırır, tapşırıqlar verir, gücünü qənaətlə sərf etməyi məsləhət görürdü. Xüsusilə Emin Rüstəmova.
* Azarkeşlərdən biri dəfələrlə Rəşad Sadıqova “90 nömrə”ni çıxar, oyununu korlayır” deyə səsləndi. Buna məhəl qoymayan baş məşqçi Volkovun qolundan sonra həmin azarkeşə tərəf boylandı.
* “Səbail” adına üzücü, futbol üçün maraqlı məqamdı ki, “Qartallar” fanklubu “Dənizçilər”dən daha çox canfəşanlıq göstərdi. Ümumiyyətlə, Bayıl təmsilçisinin ölüm-qalım savaşında belə tərəfdalarından say və keyfiyyət baxımından ciddi dəstək görməməsi xeyli sual yaradır.
* Nəticə baxımından çox vacib matç olsa da, bu oyunda “Səbail”in yetirməsi Rəvan Abasov debüt etdi.

KƏNAN BAHADIR