''Qalatasaray''la bağlı maraqlı transfer xəbəri yayılıb.

''Football-plus.az'' xəbər verir ki, İstanbul nəhəngi bu günlərdə müqaviləsini yenilədiyi Kaan Ayhanın doğma qardaşı Mərtcan Ayhana ciddi maraq göstərir. 18 yaşlı futbolçu 2014-cü ildən ''Şalke-04''ün akademiyasında çıxış edir.

Hazırda o, helzenkirhenlilərin U-19 komandasında top qovur. İstanbul nəhənginin ona maraq göstərməsi xəbərini Almaniyanın ünlü ''Bild'' nəşri yayıb. Mənbənin yazdığına görə Türkiyə çempionu istedadlı futbolçu üçün 200 min avro təzminat ödəməyə hazırdı. Xəbərdə bundesliqa təmsilçisi ''Frayburq''un da bu futbolçuya maraq göstərdiyi qeyd olunub. Ötən yay Mərtcan ''Beşiktaş''ın da maraq dairəsinə düşmüşdü.

''Şalke-04'' artıq U-19 komandasının 3 futbolçusu - Zaid Çibara, Miha Xadr və Ayman Qulasi ilə peşəkar müqavilə imzalayıb. Bu futbolçular yeni mövsümdən əsas komandada çıxış edəcək. Ancaq Mərtcan Ayhana peşəkar müqavilə təklif olunmayıb. Halbuki o, U-19 komandasının ən istedadlı futbolçularından sayılır. Ayhanın ''altyapı''da müqaviləsi 2026-ya qədər nəzərdə tutulub. Sadəcə bu futbolçu bu mövsümün böyük hissəsini zədə üzündən boş verib. Bu üzdən ''Şalke-04'' rəhbərliyi onun inkişafını bir qədər də təqib etmək istəyir. Bu futbolçu ilə bağlı qərar yeni mövsümün gedişində veriləcək. Ancaq hadisələrin bu cür axarı Mərtcanı qane etmir və bu üzdən o, yayda klubunu dəyişmək istəyir. Mərtcan Ayhan da qardaşı kimi universallığı ilə seçilir.

O, müdafiənin həm mərkəzində, həm də cinahlarında oynamağı bacarır. Bu futbolçu ''Şalke-04''ün əsas komandası ilə dəfələrlə məşqlərə çıxıb.