Fərdi Kadıoğlunun İngiltərə macerasını hələ ki, uğurlu adlandırmaq çətindi.

''Football-plus.az'' xəbər verir ki, ''Fənərbaxça''da ulduzu parladıqdan sonra ötən yay 30 milyon avroya ''Brayton''a transfer olunan istedadlı futbolçu zədə üzündən özünü göstərə bilmədi. Fərdinin 6 aylıq fasilədən sonra geri dönmək üzrə olduğu məlum olub.

İngiltərə mətbuatının yazdığına inansaq, 25 yaşlı futbolçunun adı mayın 10-da premyer-liqanın 36-cı turunda ''Vulverhempton''la səfər matçının iştirak ərizəsinə salınacaq. ''Brayton''un baş məşqçisi Fabian Hürtseler bir müddət öncə verdiyi açıqlamada uzun müddətdi, zədədən əziyyət çəkən iki futbolçu Fərdi və Ceyms Milnerin mövsümün son oyunlarında komandaya yardım edə biləcəklərini açıqlamışdı.

Qeyd edək ki, Türkiyə yığmasının üzvü son rəsmi oyununu noyabrın 2-də səfərdə ''Liverpul''a qarşı keçirib. Kadıoğlu həmin oyunda premyer-liqada ilk qolunu vursa da, sonradan zədə almış, üstəlik komandası da meydanı məğlubiyyətlə tərk etmişdi.

Sol ayağının baş barmağı qırılan futbolçu durumunun yaxşılaşmaması üzündən yanvarda əməliyyat olunmaq məcburiyyətində qalmışdı. Bu şanssızlıqlar üzündən Fərdi bu mövsüm yeni klubunda cəmi 8 rəsmi oyuna çıxaraq aktivinə 2 qol yaza bilib.