De Bruyne niyə “Siti”dən ayrılır? - Pepin fikrincə, ona heykəl qoyulmalıdı
Artıq xəbər verdiyimiz kimi, “Mançester Siti”nin yarımmüdafiəçisi Kevin De Bruyne cari mövsüm bitəndən sonra klubdan gedəcəyini elan edib.
“Etihad”da 10-cu mövsümünü keçirən belçikalı bu müddətdə əsl əfsanəyə çevrilib. “Şəhərlilər”in baş məşqçisi Pep Qvardiola da Kevinin qərarına münasibət bildirib.
De Bruynenin qərarı
Kevin mövsüm bitincə “Siti”dən ayrılmaq qərarını sosial şəbəkədə elan edib. Yayda azad agentə çevriləcək ulduz istənilən komandaya qoşula bilir. Belçikalının dediyinə görə, Mançesterdə keçirdiyi dövrü yüksək qiymətləndirir:
“Birbaşa mətləbə keçirəm: qarşıdakı aylar mənim üçün “Mançester Siti”nin oyunçusu kimi son aylar olacaq. Bunu yazmaq asan deyil, ancaq hər birimiz anlayırıq ki, bu gün geç-tez gələcəkdi. Həmin an yetişib və siz bu xəbəri məndən eşitməyi haqq edirsiz. Futbol məni sizin yanınıza gətirdi. Mən arzumun ardınca qaçdım, bu dövrün həyatımı dəyişəcəyini bilmədən. Bu şəhər və klub mənə hər şey verib. Sizin xoşunuza gəlir, ya yox – vidalaşmaq vaxtı gəldi. Bu yer ailəm üçün çox şey deməkdi. Mançester uşaqlarımın pasportunda və ən əsası hər birimizin qəlbində qalacaq. Bu şəhər həmişə evimiz olacaq. Hər tarixçənin bir sonu var. Ancaq bu fəsil gerçəkdən yaxşı idi. Son anlardan birlikdə ləzzət alaq”.
Pepin fikrincə, Kevin heykəli haqq edir
Klubdan dərhal belçikalının açıqlamasına reaksiya verdilər. Axı Kevin klubun əsl əfsanəsi və indiki heyətin kapitanlarından biridi. MS-nun baş məşqçisi Pep Qvardiola onun klubu digər əfsanələri – Serxio Aquero, David Silva və Vensan Kompani ilə müqayisə edir. Baş məşqçinin fikrincə, belçikalı yarımmüdafiəçi birmənalı şəkildə “Etihad”ın yanında heykəlinin qoyulmasını haqq edib. Qvardiolanın fikirləri:
“Kədərli gündü, ancaq həm də sevincli – ona görə ki, bütün bu müddəti Kevinlə birgə keçirmişik. Klubun son onillikdəki uğurları haqda danışmağa ehtiyac yoxdu – bu uğurları onsuz təsəvvür etmək çətindi. Kədərli gündü, ona görə ki, bir hissəmiz bizi tərk edir. Ancaq irəlidə ən azı 10 oyun var, Kevin haqq etdiyi sevgini və dəstəyi görəcək. Düşünürəm ki, o, nə vaxtsa bu ölkədə, “Mançester Siti”də oynayan ən dahi yarımmüdafiəçilərdən biridi”.
Klub da əfsanənin gedişini münasibət bildirib. “Şəhərlilər”in yaydığı açıqlamada belə deyilir:
“Mançester Siti” bu yay – müqavilə müddəti bitəndən və 10 illik işbirliyindən sonra Kevin De Bruyne ilə emosional şəkildə vidalaşacaq. Komandanın və azarkeşlərin Kevinə hörmətini göstərmək və premyer-liqada nə vaxtsa çıxış edən ən böyük oyunçulardan biri ilə vidalaşmaq üçün vaxtı var”.
Kevin karyerasını harda davam etdirəcək?
“Daily Mail”in yaydığı xəbərə görə, De Bruynenin növbəti addımı ABŞ və ya Səudiyyə Ərəbistanı klublarından birinə transfer olacaq. Həmin liqalarda onlarla avropalı veteran çıxış edir. 33 yaşlı belçikalının “Siti”dəki son illəri sağlamlıq problemləri ilə zəngin olub, bununla belə, o yenə də komandanın liderlərindən biridi.
Klubda olduğu 10 il ərzində bütün turnirlərdə 413 oyuna çıxıb, 16 mükafat qazanıb.
Digər xəbərlər
