Futbol dünyasının tanınmış simalarından olan Robert Prosineçki və onun sahibi olduğu şirkət ciddi problemlərlə üzləşib.

''Football-plus.az'' xəbər verir ki, söhbət şokolad istehsalı ilə məşğul olan ''Steviq Life'' şirkətindən gedir. Məlum olub ki, 360 min avro borcu olan şirkət müflis olmaq üzrədi.

Bu şirkətdən alacaqları olan şəxslər Zaqreb Ticarət Məhkəməsinə müraciət ediblər. Həmin müraciətə baxılıb və iyulun 1-nə məhkəmənin ilk iclası təyin olunub. Prosineçki və şirkətin əməkdaşları həmin tarixdə məhkəmə qarşısına çıxacaq.

Qeyd edək ki, ''Steviq Life'' 2018-ci ilin dekabrında cəmi 2654 avro sərmayə ilə Prosineçki tərəfindən qurulub. Kakao, şokolad və şirniyyat şirkəti kimi yaradılan ''Steviq Life'' qısa müddətdə Avropada populyarlıq qazandı və ''Stevia'' ilə rəqabət aparmağa başladı. Şirkət böyüyərək hətta fabrikə çevrildi.

Maliyyə problemləri ilə bağlı xəbərlər isə bir neçə ay öncə peyda olmağa başladı. Həmin vaxt ''Stevia Life'' şirkətinin Xorvatiyanın ən zəngin adamlarından olan Branko Roqliçin sahibi olduğu ''Orbico'' şirkəti ilə birləşəcəyi haqda şayiələr də yayılmışdı. Hazırda Monteneqro yığmasını çalışdıran 56 yaşlı Prosineçki ölkəmizdə də kifayət qədər tanınmış simadı.

Xorvatiyalı mütəxəssis 2014-17-ci illərdə yığma komandamızı çalışdırıb.