yarımfinal, ilk oyun
Neftçi (Bakı) - Sabah (Bakı) 1:2 (1:1)
Neftçi: 93. Rza Cəfərov (k), 3. Höccət Haqverdi, 19. Azər Salahlı (47. Murad Məmmədov, 78), 4. Elvin Camalov, 90. Ramil Şeydayev (22. Dembo Darbo, 60), 91. Ağadadaş Salyanski (10. Filip Ozobiç, 60), 14. Edvin Kuç (8. Emin Mahmudov, 66), 99. Ervin Koffi, 44. Yuri Matias, 24. Mustafa Sek, 11. Aleks Fernandes (18. Rinosuke Ohori, 66).
Ehtiyat oyunçular: 1. Emil Balayev, 30. Rustam Samiqullin, 17. Rəhman Hacıyev, 7. Azər Əliyev, 13. Emil Səfərov, 6. Rafael Quzzo, 77. Yeqor Boqomolski.
Baş məşqçi: Samir Abasov.
Sabah: 92. Stas Pokatilov, 17. Tellur Mütəllimov, 5. Rəhman Daşdəmirov, 15. Seymur Məmmədov, 88. Xəyal Əliyev (9. Anatoli Nuriyev, 75), 18. Pavol Safranko (k), 40. İqor Noqeyra (4. Sofian Çakla, 46), 70. Cesse Sekidika (20. Coy-Lens Mikels, 65) (7. Boyan Letiç, 90+4), 3. Con İrasabal, 13. İvan Lepinitsa, 33. Umarali Raxmonaliyev.
Ehtiyat oyunçular: 1. Yusif İmanov, 55. Nicat Mehbalıyev, 6. Abdulax Xaybulayev, 32. Elgün Dünyamalıyev, 99. Neqoş Kupusoviç.
Baş məşqçi: Vasili Berezutski.
Qollar: A.Salahlı, 11-öz qapısına (0:1). Y.Matias, 21 (1:1). P.Şafranko, 52 (1:2). 
Y.Matias 21-ci dəqiqədə penaltidən yararlana bilməyib (qapıçı). 
Vərəqələr: T.Mütəllimov, 29 (qeyri-idman hərəkəti). M.Sek, 37 (qeyri-idman hərəkəti). D.Darbo, 82 (qeyri-idman hərəkəti) - sarı. 
Hakimlər: ƏLİYAR AĞAYEV, Zeynal Zeynalov, Akif Əmirəli, Cavid Cəlilov (hamısı Bakı).
VAR hakimi: Rauf Allahverdiyev (Bakı).
VAR hakiminin köməkçisi: Kamran Bayramov (Bakı).
Hakim-inspektor: Ömər Paşayev (Bakı).
AFFA nümayəndəsi: Elçin Məmmədov (Bakı).
2 aprel. Bakı. “Neftçi Arena”. 2934 tamaşaçı. 
Birinci hissəyə 1, ikinci hissəyə 6 dəqiqə əlavə olunub. 

Yarımfinalın digər cütü ilə müqayisədə paytaxt derbisinin daha böyük maraq doğurduğu heç kim üçün sirr deyil. Təqvimdə artıq apreldi, amma “Neftçi”nin də, “Sabah”ın da çempionat yolu ilə avrokuboklara vəsiqə qazanmaq şansı hədsiz azdı. Bunu hər iki klubun rəhbərliyi də, azarkeşləri də, çalışdırıcıları da yaxşı anlayır.

İlk dəqiqələrdə nə “Neftçi”, nə də “Sabah” təhlükəli vəziyyət yarada bildi. Komandalar bəzən qısa, bəzən də uzun ötürmələrlə hücum qurmağa çalışırdı. Hər halda, əvvəlcə “bayquşlar” rəqib qapısına yol tapmağı bacardı. 11-ci dəqiqədə Raxmonaliyevin künc zərbəsindən qapı qarşısına etdiyi ötürməni uzaqlaşdırmaq istəyən Azər Salahlı topa çox yöndəmsiz şəkildə toxunmaqla avtoqola səbəbkar oldu. Bu müdafiəçinin “Neftçi” səviyyəsində olmadığını deyənlər daha bir tutarqa qazandı.

Düzdü, tezliklə “ağ-qaralar” hesabı bərabərləşdirə bildi. 19-cu dəqiqədə Sekin qapı önünə ötürməsinin qarşısını Noqeyra alsa da, Tellur Mütəllimov təhlükəni sovuşdurmaq istəyərkən topa yox, Salyanskinin ayağına zərbə endirdi. Belədə FİFA referisi “nöqtə”ni göstərdi. Pokatilov Matiasın zərbəsinin istiqamətini müəyyənləşdirsə də, təkrar zərbə qarşısında heç nə edə bilmədi. 24-cü dəqiqədə Umarali - Xəyal - Seymur kombinasiyası zamanı sonuncu topu az fərqlə qapıdan aralı vurdu. 25-ci dəqiqədə isə Şafrankonun zərbəsindən sonra top toru yandan silkələdi. 40-cı dəqiqədə Sekidikanın uzun ötürməsindən sonra Umarali topu saxlamadan zərbə endirsə də, “çərçivə”yə düşə bilmədi.

İkinci hissəyə daha fəal başlayan “bayquşlar” 52-ci dəqiqədə növbəti dəfə hesabda irəli çıxdı. Sek Elvin Camalova ötürmə verərkən Şafranko araya girdi və topu Raxmonaliyevə çatdırdı. Umarali dərhal Xəyala ötürmə verdi. Xəyal Alekslə Elvindən sıyrılıb zərbə endirsə də, top dirəyə tuş gəldi. Qayıdan topa özünü çatdıran Şafranko yaxın məsafədən zərbə ilə hesabı dəyişdi. 56-cı dəqiqədə “Neftçi” hesabı bərabərləşdirməyə yaxın oldu. Sek Aleksə ötürmə verdi. Fernandeş topu Mustafaya qaytardı. Sek cərimə meydançası daxilində iki rəqibi keçən zaman yerdə qaldı. Qayıdan topa yaxınlaşan Kuç dərhal boş zonada olan Ağadadaşa ötürmə verdi. Amma onun zərbəsi qapıdan aralı keçdi. 64-cü dəqiqədə isə Matias dubl etməyə yaxın oldu. Koffinin cərimə zərbəsindən qapı qarşısına etdiyi ötürməni Matias başla tamamlamaq istəsə də, top tirə tuş gəldi.

Oyunun sonluğu da qarşılıqlı hücumlar şəraitində keçdi. Hər iki komanda fərqlənə bilərdi. Amma gerçəklik odu ki, “Sabah” ilk oyunda qalib gəlməklə cavab görüşü ərəfəsində mərhələ adlamaq şansını ən azı 55 faizə çatdırdı. Samir Abasovun isə səhvləri düzəltmək və “Neftçi”ni finala daşımaq üçün 20 gün vaxtı var. 20 gün...

Gözdən qaçmadı
* Futbolçular və hakimlər Ümumdünya Autizm Məlumatlandırma Gününə görə meydana autizmli uşaqlarla birgə çıxdı.
* “Soldati di Sabah” “Die For You” yazılan pankart açmışdı. 
* Matias hesabı bərabərləşdirən kimi “Forza Neftçi” pirotexniki vasitələrdən yararlandı. 
* “Sabah”ın qapıçılarla işləyən məşqçisi Aleksey Antonyuk 90+3-cü dəqiqədə hakimi təhqir etdiyinə görə “qırmızı” aldı. 

ƏSƏD SEYİDOV