''Liverpul''un misirli ulduzu Məhəmməd Salah mükəmməl mövsüm keçirməkdə və adını həm premyer-liqanın, həm də mersisaydlıların tarixinə yazdırmaqda davam edir.

''Football-plus.az'' xəbər verir ki, təcrübəli futbolçu son olaraq ''Sauthempton'' ilə ev oyununda (3:1) iki qol vuraraq növbəti dəfə qələbədə mühüm rol oynadı. Salah bununla da premyer-liqada vurduğu qolların sayını 184-ə çatdıraraq turnirin tarixinin ən məhsuldar oyunçuları siyahısında 5-ci pillədə qərarlaşan ''Mançester Siti''nin sabiq ulduzu Serxio Aqueroya çatdı. Daha 3 qol vuracağı təqdirdə o, 4-cü pillədəki Endi Koulu (187) da yaxalayacaq. İlk ''3-lük''də Ueyn Runi (208), Harri Keyn (213) və Alan Şirer (260) qərarlaşıb.

Bundan başqa Salah ''Liverpul''un heyətində 390-cı rəsmi oyunda vurduğu qolların sayını 243-ə çatdırdı. O, bununla da 1920-30-cu illərdə ''qırmızılar''ın şərəfini qorumuş Qordon Hocsonu (241) geridə qoyaraq klub tarixinin ən məhsuldar oyunçuları siyahısında 3-cü pilləyə yüksəldi. Bu siyahıda isə ilk iki pillədə Rocer Hant (285) və Yan Raş (346) qərarlaşıb. Salah bu mövsüm ''Liverpul''un heyətində iştirak etdiyi 41 rəsmi oyunda 32 qol, 22 məhsuldar ötürmə ilə 54 qolun vurulmasında yaxından iştirak edib.

ƏLİ