Fatih Terimin dekabrda sürpriz şəkildə başına keçdiyi Səudiyyə Ərəbistanı təmsilçisi ''Əl-Şabab''da vəziyyət heç də yaxşı deyilmiş.

''Football-plus.az'' Səudiyyə Ərəbistanının ''Sportstuff24'' saytına istinadən xəbər verir ki, Ər-Riyad təmsilçisində çox ciddi maddi problemlər var imiş. Mənbənin iddiasına görə futbolçular çoxdandı, maaş almadıqlarına görə rəhbərlikdən narazıdılar. Hətta onların arasında son 3 ayda məvacib almayanlar da var. Bu üzdən futbolçular rəhbərliyə qarşı birləşmək qərarına gəliblər.

Belə oyunçuların başında komandanın liderlərindən olan Abderazak Hamdalla ilə Yannik Karasko gəlir. Hərçənd sonuncu noyabrdan bu yana meydana çıxmayıb! Klub prezidenti Məhəməd Əlmunacem mətbuatdan qaçmağa çalışır. Jurnalistlər onunla əlaqə saxlaya bilmirlər.

Daha bir iddiaya görə klub prezidentinin idarəçiliyindən narazı qalan idarə heyətinin bəzi üzvləri artıq istefa kağızını yazaraq ona təqdim ediblər. Hələ ki, bu məsələlərlə bağlı klubdan heç bir şəxs rəsmi açıqlama verməyib. Amma necə deyərlər, od olmayan yerdən tüstü çıxmaz.

Bu durumda bütün diqqətlər həm də Fatih Terimə yönəlib. ''Əl-Şabab'' ilə mövsümün sonuna qədər müqaviləsi olan ''İmperator''un belə vəziyyətdə komandanı oyunlara necə hazırlayacağı və ümumiyyətlə işinə davam edib-etməyəcəyi maraq doğurur. Son iki rəsmi oyunda qalib gələn ''Əl-Şabab'' çempionatda 23 oyuna topladığı 39 xalla 6-cı pillədə qərarlaşıb. Terimin təyinatı zamanı da komanda 6-cı pillədə idi.

''Əl-Şabab'' növbəti oyununu cümə günü səfərdə Kriştiano Ronaldonun şərəfini qoruduğu ''Əl-Nəssr''ə qarşı keçirəcək.

ƏLİ