Fatih Terimin çalışdırdığı ''Əl-Şabab'' növbəti oyununu keçirib. Ər-Riyad təmsilçisi Səudiyyə Ərəbistanı çempionatının 20-ci turunda öz meydanında ''Əl-Qədsiyə'' ilə qarşılaşıb.

''Football-plus.az'' xəbər verir ki, komanda buna qədər Terimin dönəmində keçirdiyi 4 ev oyununun hamısında qalib gəlmişdi. Amma bu seriya başa çatdı. Halbuki son 10 dəqiqəyə qədər oyun ''Əl-Şabab'' üçün kifayət qədər uğurlu məcrada davam edirdi. Komanda 82-ci dəqiqəyə 2:1 öndə daxil olmuşdu.

Üstəlik 79-cu dəqiqədə qonaqlar azlıqda qaldı. ''Əl-Qədsiyə''nin qabonlu ulduzu Pyer-Emerik Obameyanq birbaşa qırmızı vərəqə aldı. Amma qonaqlar azlıqda qalmalarına baxmayaraq inanılmaz əzmkarlıq sərgilədilər. ''Əl-Qədsiyə'' 83 və 90+6-cı dəqiqələrdə vurduğu qollarla tarixi sayıla biləcək bir qələbə qazandı! Əslində ''Əl-Şabab''ın başına gələnlər komandanın Terimin dönəmində nə dərəcədə qeyri-sabit oynadığını bir daha göz önünə qoydu.

Təkcə bir faktı vurğulayaq ki, bu kollektiv türkiyəli çalışdırıcı ilə iki oyundan dalbadal eyni nəticə ilə ayrıla bilməyib. Komanda bir oyunda qalib gəlirsə, növbəti oyunda mütləq məğlub olur. ''Əl-Şabab'' indiyə qədər Terim ilə 8 oyundan 4 qələbə, 4 məğlubiyyətlə ayrılıb. Məhz bu üzdən ''İmperator''un komandası uzun müddətdi, 6-cı pillədən yuxarı qalxa bilmir.

ƏLİ