Macəra dolu ...Azərbaycan premyer-liqası!

Gerçəkdən də əyləncəli dönəmə qədəm qoymuşuq. Hər turda mütləq bir-iki sürpriz hesab qeydə alınır. Məsələn, “Qarabağ” 2:0 öndə olduğu oyunda rəqibin geridönüşünə imkan yaradır, ağdamlıları səfərdə məğlub edən “Turan Tovuz” “Səbail”lə ev oyununda qələbə qazana bilmir, “Sabah” ardıcıl xal itkiləri üzündən iddiasından uzaq düşür. Yəni bu çempionatın oyunlarına baxmağa dəyər. Nə yazıq ki, stadionun yolunu tutan azarkeşlərin sayı hələ də azdı...

Tur Tovuzda keçirilən “Kəpəz” – “Sabah” oyunu ilə start götürdü. Azər Bağırovun komandasının qış toplanışında yaxşı hazırlaşdığı artıq üzə çıxır. Son üç turda iki qələbə gəncəlilərin turnir vəziyyətini bir qədər düzəltməsinə səbəb oldu.

“Bayquşlar”da isə tam əks proses gedir. Onlar üç oyunda mümkün 9 xaldan ikisini qazanıb. Vasili Berezutskinin ölkə kubokunu üstünlük verməyə meyillənməsi “Sabah”da Allah bilir neçənci dəfə qeyri-sabitlik dönəminin yaşanmasına işarədi.
“Neftçi” - “Şamaxı” oyununun gərgin mübarizə şəraitində keçəcəyi gözlənilirdi. “Ağ-qaralar” qələbə sayəsində xalını 21-ə çatdırdı. Amma onların oyununun keyfiyyəti ilə bağlı suallar qalmaqdadı. 21 oyuna 21 xal istənilən halda ölkənin ən köklu klubuna yaraşan nəticə deyil. “Şamaxı”nın taleyi isə başqa söhbətin mövzusudu. Görünür, Ayxan Abbasov mövsüm başlayandan bəri “hədəfimiz elitada qalmaqdı” deyərkən sərəncamındakı futbolçuların nəyə qadir olduğunu bilirmiş. Bu öz yerində. Sadəcə, “Şamaxı” belə nəticələr fonunda tədricən əsas autsayder imici qazanmaqdadı ki, bu da yaxşı heç nə vəd etmir.

“Turan Tovuz” “Kəpəz”ə məğlubiyyətin ardından növbəti dəfə “qəza enişi etdi”. Məntiqlə tovuzlular “Qarabağ” üzərindəki qələbənin davamını gətirməliydi. Amma belə olmadı, komanda liderlər qrupundan bir qədər uzaq düşdü. Düzdü, bunda qırmızı vərəqənin də rolu oldu. “Səbail” isə qış fasiləsindən sonra daha yaxşı təsir bağışlayır. “Dənizçilər” bu nəticələrlə elitada qalmaq uğrunda amansız mübarizədən sona qədər çəkilməyəcəyini göstərir.

Sumqayıtda keçirilən qarşılaşmada hesab açılmadı. Vaqif Cadavoun komandası “Sabah”ın ardından “Araz-Naxçıvan”a da boyun əymədi. “Qırmızı-ağlar” nəticələri yaxşılaşdırmasa, mövqeyini itirə bilər. Qış fasiləsindən sonra “Araz-Naxçıvan”ın eniş yaşadığını deyə bilərik. “Sumqayıt” isə son heç-heçəni özü üçün qənimət sayır.

Avrokuboklarla bağlı heç bir hədəfi qalmayan, müxtəlif turnirlərdə keçirdiyi son üç oyunda uduzan “Qarabağ”ın artıq bütün diqqətini çempionata yönəldəcəyi aydındı. Lakin Qurban Qurbanovun komandası bu yöndə ümidləri doğrultmadı. Düzdü, “köhlən atlar” 1-ci hissədə iki qol vurdu və fasiləyə öndə yollandı. Lakin “Zirə” 2-ci yarıdakı möhtəşəm geridönüşlə “Qarabağ”ın qapısından 3 top keçirməyi bacardı, tarixində ilk dəfə Ağdam təmsilçisini evdə məğlub etdi. Axır ki Qurban bəy də “Qarabağ”ın böhran yaşadığını boynuna aldı. Amma komandanı bu durumdan necə çıxaracağını bilirmi? Tezliklə bu suala cavab tapacağıq.

Misli premyer-liqası
3-cü dövrə, 21-ci tur
31 yanvar
Kəpəz – Sabah 3:2
Neftçi – Şamaxı 1:0
1 fevral
Turan Tovuz – Səbail 1:1
Sumqayıt – Araz-Naxçıvan 0:0
2 fevral
Zirə - Qarabağ 3:2

1. Qarabağ 21 16 2 3 53-14 50
2. Araz-Naxçıvan 21 13 4 4 23-15 43
3. Zirə 21 12 3 6 34-19 39
4. Turan Tovuz 21 9 9 3 29-22 36
5. Sabah 21 6 10 5 30-28 28
6. Sumqayıt 21 6 4 11 15-28 22
7. Neftçi 21 4 9 8 19-30 21
8. Kəpəz 21 5 2 14 20-46 17
9. Şamaxı 21 4 5 12 19-29 17
10. Səbail 21 4 4 13 20-31 16

Bombardirlər: Coy-Lens Mikels (Sabah), Felipe Santos (Araz-Naxçıvan), Davit Volkov (Zirə) – 8, Cesse Sekidika (Sabah), Leandro Andrade (Qarabağ) – 7.

Növbəti turun oyunları fevralın 9-11-i aralığında keçiriləcək: “Şamaxı” – “Sumqayıt”, “Sabah” – “Turan Tovuz”, “Araz-Naxçıvan” – Kəpəz”, “Zirə” – “Neftçi”, “Qarabağ” – “Səbail”.

ƏSƏD SEYİDOV