"Qarabağ" Avropa Liqasının əsas mərhələsinin "Tofiq Bəhramov"da keçirilən 7-ci tur matçında FKSB-yə uduzdu - 2:3.

"Football-plus.az" xəbər verir ki, "köhlən atlar"ın baş məşqçisi Qurban Qurbanov oyunsonrası mətbuat konfransında jurnalistlərin suallarını cavabladı.

- Avropa Liqasında evdəki son matçımız idi. Bütün oyunlarda bizlərlə olduz. Həm siz media nümayəndələrinə, həm də azarkeşlərə təşəkkür edirəm. Şansımız az olsa da, tərəfdarlarımız bizə güvəndi. Haqlıydılar. Ona görə ki, xeyli belə oyun keçirmişik və son dəqiqələrdə yaxşı nəticələr əldə etmişik. Oyuna gəlincə, danışacaq çox şey yoxdu. Bəzən futbolun düşünmədiyin anları olur. Bu gün onu gördük. Üç künc zərbəsi, üç qol... Son saniyələrdə dördüncü künc zərbəsini də vurdular. Rəqibi təbrik edirəm. Çox istəkliydilər. Əslində qalib gələ də bilərdik. Görünür, hardasa səhvlər var. Komandam çox əziyyət çəkdi. Bütün oyunlarda belə idi. Bu mövsüm ən uğursuz seriyamız oldu. Hansı ki, uduzmamalı olduğumuz oyunlarda uduzduq. Təbii ki, bunun bizim üçün faydası da var. Hazır olmalıyıq.

- Bu gün "çərçivə"də Fabian Buntiçə güvəndiyinizə görə peşman olduz?
- Yox. Niyə olmalıyam? Koxalski iki gün əvvəl zədələnib.

- Künc zərbələrindən buraxılan qollarda səhvləri var idi?
- Birində ola bilər. Amma epizodlara təkrar baxdım. Asan qollar deyildi.

- Juninyonun yoxluğu özünü göstərdi. "Qarabağ"ı gücləndirməyi düşünürsüz?
- Avropa təcrübəsinə baxsaz, böyük klublar da üçillik, beşillik heyət formalaşdırır. Üç-dörd ildən sonra eniş olur. Biz böyük klubların iş prinsiplərini təhlil edirik. Nə vaxtdan uğursuz olduqlarına baxırıq. Heyətimizdə üç-dörd futbolçunu, sadəcə, "23-lüy"ə əlavə etmişdik. Məqsədimiz onların üstün keyfiyyətlərindən yararlanmaq deyildi. Juninyo kimi futbolçuların olanda da uduzursan. O da qol epizodlarını qaçırır. Kaşukun epizoduna gəlincə, çox sürətli hücum idi. Onun həmin anda orda olması çox vacib idi. Əsas budu. İnanıram ki, Kaşuk qarşıdakı oyunlarda belə epizodlardan daha yaxşı istifadə edəcək. Potensialı var. Mütləq yeni transferlərimiz olacaq. Komandaya bir neçə yeni oyunçu dəvət etmək istəyirik. Əfsuslar olsun ki, həmişə olduğu kimi, qışda arzuladığımız səviyyədə futbolçu tapmaq çətindi. Növbəti aylarda daha fəal çalışacağıq.

- Avropa Liqasındakı nəticələr "Qarabağ"ın ölkədaxili oyunlarına psixoloji təsir göstərə bilər?
- Futbolçularım çox üzgündü. Çalışacağıq ki, qarşıdakı oyunlara daha hazırlıqlı olsunlar. Ola bilər ki, üzgünlük ilk oyunlarda özünü göstərsin. Zamanla komandanı formalaşdırmağa çalışacağıq. Son matçımız "Olimpiakos"a qarşıdı. Bu görüşə də ciddi hazırlaşmalıyıq. Çünki belə klublara qarşı oynamaq hər futbolçu üçün böyük təcrübədi. Gələn il də bu komandalarla qarşılaşa bilərik.

- FSKB-dən hansısa futbolçu diqqətinizi xüsusilə cəlb etdimi?
- FKSB kollektiv kimi cəlbedicidi. Hər xətdə lider futbolçuları var. Hamısı məşqçinin seçdiyi oyun sxemini yerinə yetirən qabiliyyətli oyunçulardı. Xüsusi vurğulaya biəcəyim futbolçu da var, amma adını deyə bilməyəcəm.

- Leandro bu gün pleymeyker mövqeyində oynadı və qol vurdu. Sizin üçün onu vinger oynatmaq yaxşıdı, yoxsa pleymeyker?
- "Sol ayağ"ı olsaydı, həmişə sağda oynadardım. Qalan futbolçulardan seçilir. Başqa xüsusiyyətləri də var. Lazım olan qədər faydalanırıq.

- Avropa Liqanın format dəyişikliyi uğursuz nəticələrdə nə dərəcədə rol oynadı? Çünki siz, adətən, ilk oyundan sonra rəqibi daha yaxşı təhlil edirsiz. Burda belə şans yoxdu...
- Bir az geri qayıdacam. Bu il avrokuboklara çox yaxşı hazırlaşmışdıq. Komandamız Avstriyada keçirdiyimiz yoxlama oyunlarında da daha yaxşı və güvənli idi. Bunu ilk oyunlarda hiss etdik. "Linkoln" və "Ludoqorets"lə matçları da bura daxil edə bilərəm. Bəli, format fərqli idi, sadəcə, nəticə olmadı. Hadisələrin axarında hiss olundu ki, daha təcrübəli komanda olmuşuq. Böyük klublara qarşı rahat oynayırıq. Zaqreb "Dinamo"suyla oyunları xatırlayaq. Xeyli qol imkanımız oldu. Görünür, avrokubok matçlarından yaxşı nəticə çıxarmalıyıq. Riskli futbol oynayırıq. Oyunçularım həmişə cəsarətli olmaq istəyir. Hansısa matçlarda ustalıq səviyyəsi çatmaya bilər. Məsələn, bu gün üç künc zərbəsindən üç qol buraxdıq. Həqiqətən təsiredicidi. Formata gəlincə, növbəti mövsümlərdə daha yaxşı fikir söyləmək olar. Hər şeyi formatın üzərinə atmayaq. Futbolçulara başqa cür təsir edər.

KƏNAN BAHADIR