Misli premyer-liqasında 2024/25 mövsümünün ilk 19 turu geridə qalıb.

Turnir cədvəlindəki durum hər kəsə bəllidi. Sürpriz nəticələrə imza atan komandalar da var, proqnozları doğruldan, azarkeşlərinin gözləntilərini artıqlamasıyla qarşılayanlar da. Mövcud duruma əsasən “Qarabağ”ın liderliyi, “Səbail”in sonuncu pillədə qərarlaşması, “Kəpəz”lə “Şamaxı”nın premyer-liqada qalmaq uğrunda mübarizə aparması, “Sumqayıt”ın ortabablar sırasında olması, “Sabah”ın ilk “dördlüy”ə yüksəlmək üçün əlindən gələni əsirgəməməsi, “Zirə”nin yenidən avrokuboklara yollanmaq istəməsi futbol ictimaiyyəti tərəfindən adi hal kimi qarşılanır. “Futbol ili”nin xoş sürprizləri sırasında isə “Araz-Naxçıvan”la “Turan Tovuz”un yuxarı pillələrdə qərarlaşması var. Məhz bu məqamlar çempionatımız haqda müsbət fikirlər səsləndirməyə müəyyən əsaslar verir. Hər halda, uyğun “qan dəyişikliyi”, demək olar ki, bütün hallarda faydalı olub və əksər hallarda ruh yüksəkliyi yaradıb.


Kimsə qaldı axı! Deməli, oxucularımız “bəs, “Neftçi?” sualını ünvanlamamış mövzuya keçid etməyin vaxtıdı. Paytaxt təmsilçisi öz qrupunda yalqızdı. Söhbət böyük ümid bəslənilsə də, xaos yaşayan, özünü heç cür doğrultmayan, dəyişikliklərin də işə yaramadığı komandadan gedir. Bəli, bu xüsusiyyətlərə cavab verən yeganə komanda “ağ-qaralar”dı. Düzdü, qeyd olunanlar və aşağıda bəhs edəcəklərimiz yeni xəbərlər deyil. Artıq paytaxt təmsilçisinin azarkeşləri uğursuzluqlara alışıb, kəskin emosiyaları “ölüb”. Bəlkə də tərəfdarlar nəinki komandanı tənqid etməkdən, hətta jurnalistlərin bu tipli yazılarını oxumaqdan da bezib. Məni bağışlayın, “Neftçi” azarkeşləri! Axı gözçıxaran səhvləri deməsəm, bağrım çatlayar...

Yeni mövsümə Roman Qriqorçukun rəhbərliyi altında başlayan, ilk 9 turda qələbəyə həsrət qalan “ağ-qaralar” baş məşqçi postuna Samir Abasovu gətirdi. Elə “Sumqayıt”dan “oğurlanan” mütəxəssis də komandanı hələ ki 10 premyer-liqa matçına çıxarıb və bunların yalnız 3-də qalib gəlib. “Neftçi”nin heyətdə köklü dəyişikliklər edəcəyini, Qəbələdə təşkil olunan toplanış çərçivəsində azı bir yoxlama oyununda gücünü sınayacağını proqnozlaşdıranlar çox idisə, bir neçə gün Samir Abasov klubun mətbuat xidmətinə verdiyi açıqlamada təlim-məşq toplanışının bitdiyini dedi. Düzdü, bakılıların “Qəbələ” ilə qarşılaşması mümkün idi. Lakin əldə etdiyimiz məlumata görə, “qırmızı-qaralar” yanvarın 11-də oynamaq təklifini qəbul etməyib.

Qısası, baş məşqçinin toplanış dövrünü yaxşı dəyərləndirməsinin ciddi izahı ola bilməz. Üstəlik Abasov hələ də azarkeşlərə ümid verməkdən çəkindi:

Maraqlıdı, görəsən, dəfələrlə mövsümün ikinci yarısını nişan verən mütəxəssis niyə hələ də cəsarətli danışmaqdan qorxur? O, niyə minlərlə azarkeşin həllinə göz dikdiyi problemlər haqda müsbət fikir səsləndirmir? Təbii ki, ən əsas məsələ bu deyil. Ən aktual mövzu “Neftçi”nin yoxlama oyunu keçirməyən yeganə komanda olmasıdı. Mütləq yeniliklər olmalıdı və olacaq da. Problem prosesin yubanmasıyla bağlıdı. Yeni oyunçuların, xüsusilə legionerlərin “Neftçi”yə, çempionata uyğunlaşması üçün vaxt lazımdı ki, bakılılar yetərincə vaxt itirib.

Qısası, transfer planları dərhal reallaşdırılmalıdı. Yeri gəlmişkən, bu məsələylə bağlı diqqətiçəkən məqam var. Sən demə, həm “köhlən atlar”, həm də “ağ-qaralar” Polşa “Motor”unda çıxış edən Samuel Mrazla maraqlanır. Tapın görək, adı çəkilən hücumçunun hansı təklifi cavablaması mümkün görünür? Cavab üçün çox düşünməyə ehtiyac yoxdu. “Neftçi” Mrazı yalnız daha çox maaş vədiylə əldə edə bilər. Bəlkə ağdamlıların məlum perspektivi buna belə imkan verməsin!

Sözümün canı odu ki, “Neftçi” dərhal işə başlamalıdı. Yox-yox, hələ ki, avrokuboklara yollanmaq uğrunda mübarizəyə qoşulmaqdan söhbət getmir. Bunun üçün əvvəlcə “Turan Tovuz”la aradakı 12 xal fərqini “əritmək” lazımdı. Hadisələrin axarı isə buna inanmaq üçün şərait yaratmır...

KƏNAN BAHADIR