“Biz çempionatı təşkil edərkən bəzi problemlərin üzə çıxacağını bilirdik”
Futbol üzrə ölkə çempionatının bütün liqalarında qış fasiləsi yarandı.
Cari futbol mövsümü hadisə baxımından yetərincə zəngindi. Xüsusən də bu fikri 2-ci liqaya aid etmək lazımdı. Kənardan baxanda belə düşünmək olar ki, bu liqa vaxtından əvvəl dünyaya gələn uşağa bənzəyir. Oyuna çıxmaqdan imtina edən kim, iştirak ərizəsində adı olmayan futbolçusunu meydana buraxan kim, rəhbərsiz qalan klub hansı...
İkinci liqada 14 komanda iştirak edir ki, əksəriyyəti sponsorsuzdu. 2023-cü ildə 10 komanda ilə yaranan, sonradan 14 komandaya çatdırılan liqada büdcə ilə bağlı qarışıqlıq geniş vüsət alıb. “Füzuli”, “Lerik”, “Sheki Siti” və “Ağdaş” pulsuzluqdan əziyyət çəkir. “Sheki Siti”, “Göygöl” və “Hypers Quba” iştirak ərizəsinə salınmayan futbolçusunu meydana buraxdığı üçün texniki məğlubiyyət alıb. “Lerik” isə yolpulu tapa bilmədiyinə görə 7-ci turun “Şəfa” ilə oyununa çıxmadı. “Ağdaş”ın prezidenti Rəhman Əliyev çayda boğularaq dünyasını dəyişdiyinə görə onun işlərini baş məşqçi görür. Yəni ağdaşlılar çempionatı yola verir.
Bir neçə gün öncə “Qusar” “Şahdağ Qusar”la oyuna çıxmadı. Nədi-nədi, bir neçə futbolçusu “Birbaşa Bakı”nın heyətində minifutbol çempionatında oynamağı daha üstün tutdu. Bir sözlə, 2-ci liqada problemlər aşıb-daşır. Bəs bu liqanın problemləri azalmaq əvəzinə niyə ilbəil daha da artır?
Bu sualı Peşəkar Futbol Liqasının texniki-idman direktoru Elgiz Abbasova ünvanladıq. Onun “Futbol+”ə cavabı belə oldu:
“Peşəkar Futbol Liqası tərəfindən 2-ci liqada qeyd etdiyiniz problemlərlə bağlı müntəzəm müzakirələr aparılır. Təbii ki, hansısa komandanın oyunda iştirak etməməsi çempionat üçün yaxşı hal deyil. AFFA İcraiyyə Komitəsinin qərarı ilə 2-ci liqanın təsis olunmasından sonra yarışın keçirilməsi Peşəkar Futbol Liqasına həvalə olundu. Biz çempionatı təşkil edərkən bəzi problemlərin üzə çıxacağını bilirdik. Amma çatışmazlıqları bilə-bilə gözləmək onların həllinə gətirib çıxarmayacaq. Xüsusilə bölgələrdə belə yarışların təşkil edilməsi futbolun kütləviliyi baxımından önəmli yerlərdən birini tutur. Biz də bunu nəzərə alaraq bu il də eyni qayda ilə çempionatı keçirmək qərarına gəldik. Yanaşmamız mənfi məqamları görüb onların həlli istiqamətində addımlar atmaqdı. İkinci liqada bütün oyunların canlı yayınlanması çempionatın təbliğində mühüm yerlərdən birini tutur. Bununla yanaşı, yeni istedadların üzə çıxarılması, peşəkar məşqçilərin formalaşması əsas məqamlardan sayılır. Gələcəkdə liqanın səviyyəsinin artacağına ümid edirik”.
RÖYANƏ OĞUZ
Digər xəbərlər
