2024-ün sonuna cəmi iki gün qalır. Artıq “Futbol+”in ənənəvi, ümummilli sorğunun nəticələrini açıqlamasının vaxtıdı.

Bu prosesin gedişində bizə yardım göstərə hər kəsə bəribaşdan təşəkkür edirik. Biz futbol ictimaiyyətini müxtəlif təbəqələrini əhatə edən 180 respondentə səs hüququ tanımışıq. Respondentlər siyahısında yığma, klub məşqçiləri, kapitanlar, mətbuat katibləri, jurnalist ordusu, ölkənin futbol rəhbərliyi, mütəxəssislər, agentlər, AFFA nümayəndələri və əvvəlki qaliblərimiz var. Siyahıda olanlardan yalnız Fernando Santuş sorğuya qatılmadı ki, biz də onun mövqeyini anlayışla qarşılayırıq. Portuqaliyalı mütəxəssis fikrini belə əsaslandırdı:

Açığı, biz “10-luğ”u tərtib edəndə məhz elə Toral Bayramovla Elvin Cəfərquliyev arasında gərgin mübarizə gedəcəyini proqnozlaşdırırdıq. Gözlədiyimiz kimi də oldu: “Qarabağ”ın yerli ulduzlarından biri o birini, yəni Toral Elvini cəmi 45 xal qabaqladı!

Görünür, burda futboldankənar amillər, yəni Elvinin bir neçə dəfə qırmızı vərəqə almaqla komandasını pis vəziyyətdə qoyması da müəyyən rol oynadı. Amma Cəfərquliyev bu nəticə ilə öyünə bilər. Ötənilki sorğumuzda 197 xalla 3-cü olan cinah müdafiəçisi bu dəfə xalını 129 vahid artırdı. 24 yaşını fevralda tamamlayacaq Toral Bayramovun qələbəsi isə tam ədalətlidi. Lənkəranlı sol cinah müdafiəçisi və yarımmüdafiəçisi 180 anketin 160-da yer aldı. O, yalnız AFFA nümayəndələrinin səsverməsində Elvinə uduzdu. Ümumiyyətlə, bu iki futbolçunun 2024 üçün statistikasını müqayisə edəndə Toralın müəyyən üstünlüyünü görmək mümkündü. Bayramov il ərzində müxtəlif turnirlər çərçivəsində, eləcə də milli formada keçirdiyi 62 oyunda (3910 dəqiqə) 20 qol və 10 məhsuldar ötürmə, Cəfərquliyev isə 53 oyunda (3810 dəqiqə) 2 qol və 10 məhsuldar ötürmə ilə yadda qaldı.

3-cü yeri isə Mahir Emreli tutdu. Əslində “Nürnberq”in formasını geyən hücumçu da ötən illə müqayisədə xalını çox artırıb. Sadəcə, ilin ilk yarısını zəif keçirməsi onun şansını xeyli azaltdı. Üstəlik Mahir il ərzində yığmanın heyətində cəmi bir qol vurub.

Rza Cəfərov, Nəriman Axundzadə və Səbuhi Abdullazadə bu il topladığı xalı avans kimi qəbul etməli, növbəti illərdə yenidən ən yaxşı adı uğrunda mübarizəyə qoşulmalıdılar. Ötən il cəmi 88 xal toplayan Toralın parlaq nümunəsi ortadadı – o, artıq fəxri kürsünün ən yüksək pilləsindədi. Ümid edirik ki, 2025 qalib üçün daha parlaq il olacaq, nəhayət, legioner karyerasına başlayacaq.

“Futbol+” böyük həvəslə keçirdiyi 26-cı sorğuya yekun vurur. 2025-in həm nominantlarımız, həm də futbolumuz üçün daha parlaq nəticələrlə əlamətdar olacağına ümidlərlə!