Məlum olduğu kimi çox zəif və ağır mövsüm keçirən ''Beşiktaş'' yanvarın 31-də Avropa Liqasının əsas mərhələsinin sonuncu turunda Niderlandda ''Tvente''nin qonağı olacaq.

Enshede şəhərinin bələdiyyə sədri Rulof Blekerin təhlükəsizliyi əsas gətirərək qonaq fanatların stadiona buraxılmaması ilə bağlı qərar qəbul etdiyini xəbər vermişdik. Əslində dekabrın 17-də hər iki klubun, UEFA-nın, eləcə də şəhərin rəsmiləri arasında toplantı keçirilmişdi. Amma 3 gündən sonra Bleker tərəfindən ''Beşiktaş''a məktub göndərilmiş və bu qərarın dəyişməyəcəyi qeyd olunmuşdu. Buna səbəb isə ''Beşiktaş'' fanatlarının guya avrokubok matçlarında sərgilədikləri davranışlardı.

Bu arada İstanbul nəhəngi UEFA-ya müraciət etdiyini rəsmən açıqlayıb. Müraciətdə oyunun hər iki klubun azarkeşlərinin normal şəkildə matçı izləyə biləcəyi bir stadionda keçirilməsi tələb edilib. ''Beşiktaş''ın fikrincə, ''Tvente'' onların fanatları üçün təhlükəsizliyə zəmanət vermirsə, deməli oyun başqa bir məkanda və stadionda oynanılmalıdı.

Xatırladaq ki, bu mövsüm artıq ''Lion''la səfər oyununa ''Beşiktaş'' fanatları buraxılmamışdı. Tel-Əviv ''Makkabi''sinə qarşı ev oyunu isə siyasi səbəblər üzündən Macarıstanın Debretsen şəhərində, boş tribunalar önündə keçirilmişdi.

ƏLİ