Qış fasiləsinə 3-cü pillədə yollanan “İmişli” heyətini gücləndirmək niyyətindədi. Ona görə ki, bölgə təmsilçisinin lider “Qəbələ”dən 8 xal geridə olması klub rəhbərliyini ciddi narahat edir.

Artıq daha güclü komandanın formalaşdırmasıyla bağlı ilkin addımlar atılıb. “Football-plus.az”ın əldə etdiyi məlumata görə, “İmişli” sabiq futbolçusu Gilyerme Silvanı heyətinə cəlb edib. Braziliyalı futbolçu həm müdafiə, həm də hücum xəttində özünü yaxşı tərəfdən göstərmək qabiliyyətlərinə malikdi. Lakin o əsasən müdafiənin sol cinahında top qovur.

Maraq üçün qeyd edək ki, Silva 2023/24 “futbol ili”ndə “İmişli”nin formasını geyib. İş orasındadı ki, həmin mövsümün 26-cı turu çərçivəsində “Araz-Saatlı”ya qarşı meydana çıxan oyunçu təcavüzkar davranışa görə birbaşa qırmızı vərəqə aldıqdan sonra rəqibi vurmağa cəhd edib və bu səbəbdən 4 oyunluq cəza alıb. Həmçinin ona üç ay sınaq müddəti təyin edilib. Yəni Silva komandanın yeni ildə baş tutacaq ilk dörd matçında forma geyə bilməyəcək.

KƏNAN BAHADIR