"Qarabağ" Avropa Liqasının 3-cü turunda evdə "Ayaks"a uduzdu - 0:3.

"Football-plus.az" xəbər verir ki, "köhlən atlar"ın baş məşqçisi Qurban Qurbanov oyunsonrası mətbuat konftansında jurnalistlərin suallarını cavablayıb.

- Təəssüf ki, məğlub olduq. Oyuna pis hazırlaşmamışdıq. Gördüz ki, ilk dəqiqələrdən hücum futbolu oynadıq. Məğlubiyyət bir yana, oyunçularımın qırmızı vərəqə alması xoş olmadı. Əlimizdəki futbolçuların sayının azalması növbəti oyunlar üçün problem yaradır. Komandamın cəsarətindən razı qaldım. Böyümək istəyirik. Belə böyük oyunlarda bəsit penaltilər və vərəqələr verilirsə, deməli, daha xırda elementlərə də fikir verməliyik. Azarkeşlərimizə təşəkkür edirəm. Doqquz nəfərlə qaldığımız halda bizi stadionda tək qoymadılar və sona qədər dəstəklədilər. Belə davam etməliyik. İnanıram ki, qarşıdakı oyunlarda daha yaxşısını edəcəyik. Bu gün böyük komandanın nə demək olduğunu bir daha anladıq. "Ayaks" kiçik fürsətlərdən istifadə etdi.

- Nəticəyə təsir edən amillərdən biri də qırmızı vərəqələr oldu. Elvin Cəfərquliyev haqda demişdiz ki, belə davam etsə, müəyyən tədbirlər görüləcək. Romao da bu siyahıdadı. Onlar haqqında hansısa tədbir görüləcəkmi? Profilaktik söhbət aparılacaqmı?
- Söhbət mütləq olacaq. Amma futbol mübarizə oyunudu. Təbii ki, ilk növbədə futbolçunu qınayıram. Amma belə epizodlarda qırmızı vərəqə verilirsə, gərək futbol oynamayaq. Epizodlara baxsaq, məsələn, Romaodan əvvəl rəqib ona mane olmağa çalışır. Deyiləcək sözüm yoxdu. Yəqin biz hakimliklə bağlı qaydaları dərindən bilmirik. Juninyonu da iki əllə tutub dartırdılar. Bəs onda niyə rəqibə "qırmızı" verilmədi? Mən heç vaxt hakimlərin işinə qarışmaq isəmirəm. Amma məncə, hakim qərarlarının arxasında nəsə durur. Onsuz da böyük klublara qarşı oynayırıq...

- Hakimlərin qərarlarından klub olaraq, UEFA-ya, FİFA-ya şikayət edəcəksizmi? Başqa klubların təcrübəsində belə nümunələr var.
- Yəqin ki, yox. Çünki belə addımlar atmışıq və faydası olmayıb. Biz onlara heç nəyi düzgün izah edə bilmirik. Məncə, bu barədə daha çox danışmasam, yaxşıdı. Hamımız bu fikirdə olsaq, həm komandanın, həm də azarkeşlərin hakimlərə qarşı aqressivliyi artar və bu, yaxşı nəticələnməz.

- Onsuz da heyət kifayət yetərincə kasad idi. Bu gün də iki qırmızı vərəqəylə üzləşdiz. Belə durumda "Bude/Qlimt"ə qarşı nə edəcəksiz?
- Rahat olun. Nə lazımdısa, edəcəyik. Səfərə çəkinmədən yollanacağıq. Düzdü, "Bude/Qlimt" rəqibinə oynamağa imkan verməyən komandadı. Amma heyətimizdə meydana çıxmaq, şansını sınamaq istəyən oyunçular var. Onlarla birgə yaxşı nəticələr qazanmaq istəyirik.

- Bəhlul Mustafazadəni əsasən start heyətində görürdük. Bu gün müdafiə xəttindəki səhvlər məğlubiyyətdə böyük rol oynadı. Sizcə, Bəhlul ilk dəqiqələrdən meydana çıxsaydı, daha yaxşı olmazdımı?
- Düzdü, Bəhlul əsas oyunçumuzdu, amma onun da səhvləri olub. Bu gün Bəhlul olsaydı, qalib gələrdik deyə bir fikir yoxdu. Məncə, bu gün Bədavi və Medina start heyətində oynamağa daha çox layiq idi.

- "Bayer-04" "Ayaks"dan daha güclü komanda idi. Amma bu rəqibə qarşı daha yaxşı oyunlar göstərirdiz. Sanki son oyunlarda məğlubiyyətlə barışırsız. Bir ildə nə dəyişdi?
- Xeyr, biz heç vaxt məğlubiyyətlə barışmamışıq. Buna inanın. Azlıqda olsaq da, oyunumuza sadiq qalmağa çalışırıq. İstənilən komanda illər ərzində uğurlu ola bilməz. Hardasa eniş yaşanır. Məğlub olsaq da, hər oyunda xeyli qol vəziyyəti yaradırıq.

- Bu gün bəzi tanınmış şəxslər "Qarabağ"da yenilənmənin vacibliyini vurğulayır. İstər heyət, istərsə də baş məşqçi baxımından. Sizcə, ikinci Qurban Qurbanov varmı?
- Bəlkə kimlərsə söhbət olsun deyə nəsə yazır. Onların "Qarabağ" azarkeşi olub-olmadıqlarını bilmirəm. Bu haqda nə fikir bildirə bilərəm? Deyiləcək sözüm yoxdu. Sağ olsunlar. Bilsinlər ki, istənilən sahədə çalışan azərbaycanlı mənim üçün dəyərlidi. Hansısa fikrinə görə həmvətənimə qarşı düşüncəm dəyişə bilməz. Hər kəsdən xahiş edirəm ki, mənə belə informasiyalar verməsin.

- Avropa Liqasının yeni formatında keçirdiyiniz oyunlar haqda fikriniz necədi?
- 3 oyun, 3 məğlubiyyət... Amma inanın ki, mən burda böyük problem görmürəm. Böyük klublara qarşı çıxış edirik. Bizi başqa ölkələrdə tanıyırlar. Həmçinin azərbaycanlılar böyük komandaları Bakıda görür. Futbolçularım onlara qarşı çəkinmədən oynayır. Qarşıda hələ çox oyun var. Biz sona qədər mübarizə ağaracağıq. Sadəcə, furbolumuza qarşı neqativ fikirlərin səsləndirilməsinin tərəfdarı deyiləm. İşimizi yaxşılaşdırmağa çalışırıq. Şükürlər olsun ki, azarkeşlərimiz çoxdu. İnanıram ki, daha yaxşı nəticələr əldə edə biləcəyik.

- Bu mövsüm iki fərqli "Qarabağ" izləyirik. Komanda premyer-liqada bütün şansları dəyərləndirir, rəqiblərini bağışlamır. Avrokuboklarda isə bunun əksi baş verir. Nə edə bilərsiz ki, vacib epizodlarda qol şansları əldən verilməsin?
- Özünüz də çox gözəl bilirsiz ki, rəqiblərin heyətində olan futbolçuların ustalıq səviyyəsi bizdən yuxarıdı. Amma bizim başqa düşüncələrimiz yoxdu. Öz işimizi yaxşılaşdırmaq istəyirik. Reallıq odu ki, Avropa təcrübəsi bizi həmişə üstələyib. Özümüzü meydanda nə qədər sərbəst hiss etsək də, azdı. Ona görə ki, rəqiblər ilboyu belə tempdə oynayır.

KƏNAN BAHADIR