"Qarabağ" bu gün Budapeştdən vətənə dönüb.

Football-plus.az xəbər verir ki, Ağdam təmsilçisinin baş məşqçisi Qurban Qurbanov Heydər Əliyev adına Beynəlxalq Hava Limanında jurnalistlərin suallarını cavabladı...
- Bu dəfə oyunun ilk dəqiqələrində fərqli "Qarabağ" gördük. Səfərdə olmasına baxmayaraq, komanda hücum edirdi. Qolu ilk dəqiqələrdən axtarırdı. Görünür ki, Çerçesovun komandasını əməlli-başlı təhlil etmişdiz...
- Əvvəlcə jurnalistlərə təşəkkür edirəm. Səhər saatları olmasına rəğmən, bizi burda qarşılayırsız. Dəyər verdiyiz üçün çox sağ olun. Bəzən istədiyin kimi oyun alınmır. Bir çox qarşılaşmalarda istəyirik ki, ilk dəqiqələrdən qol vuraq. Həmişə istəyirik ki, oyunu ələ alaq, üstünlük bizim tərəfimizdə olsun. Bəzən alınır, bəzən də alınmır. Elə olur ki, rəqib bizə imkan vermir. Elə olur ki, qarşı tərəf daha yaxşı başlayır. Amma dünən hər şey bizim üçün yaxşı başladı. İstəyirikdik ki, tez qol vuraq. Bu da çox şükür ki, alındı. Deməzdim ki, rəqibi xüsusi təhlil etdik. Düşündüyümüzü daha yaxşı etdik, sıx oynadıq. Bunun nəticəsində sonda hər şey istədiyimiz kimi oldu.
- Çerçesovla oyundan sonra görüşüz oldu?
- Həm oyundan əvvəl, həm də sonra görüşümüz oldu. Sadəcə, təbrik etdi. Başqaları necə davranırsa, Çercesov da elə etdi.
- "Viktoriya" ilə görüşdə nəyə ümid etmək olar. Gözləntiləriniz nədi?
- Ümidlə hazırlaşacağıq. Əlimizdə olan şansdan maksimum istifadə etmək istəyəcəyik. Bu oyunda qalib gəlsək, qrupa vəsiqə qazanırıq. Bu səbəbdən də daha yaxşı və istəkli olmalıyıq. Səhvsiz oynamağa çalışmalıyıq. Rəqibi təhlil edəndən sonra ətraflı fikir bildirmək olar. Hər halda, pley-offa qədər gələn komanda elə-belə olmur. Ümumiyyətlə, Çexiya komandaları çox intizamlıdı. Onların çox yaxşı müdafiə xətti olur. Standart vəziyyətlərdə çox təhlükəlidilər. Rəqibi təhlil edəndən sonra ən yaxşısını etmək üçün əlimizdən gələni edəcəyik.
- Rəqibləri ilk oyunundan sonra daha yaxşı tanıyırsız. Birinci görüşün Bakıda keçirilməsi bizim üçün üstünlükdü, yoxsa...
- Qismətimiz budusa, razılaşmalıyıq. Evdəki oyuna yaxşı hazırlaşmalıyıq. İnşallah, bizim üçün üstünlük olar.
- Premyer-liqanın növbəti turunda "Sumqayıt"la qarşılaşacaqsız. Oyunun təxirə salınmasını istəyəcəksiz?
- Belə fikrimiz yoxdu. İnşallah, meydana çıxıb mübarizə aparacağıq. Sonrasına baxarıq.
- Qarşıda iki yol var: Çempionlar Liqasının və ya Avropa Liqasının qrup mərhələsi. Komandanın bu turnirlərdə mübarizə aparmaq üçün gücü yetərlidi? Medina və Maksim zədəlidilər. Bu səbəbdən də müdafiəçi almaq haqda düşünmək olar?
- Müdafiə xətti ilə bağlı fikrimiz yox idi. Ola bilər ki, digər mövqelərdə hansısa dəyişiklik olsun. Amma düşünürəm ki, əlimizdəki heyət yetərlidi. Komandanın üzvləri çox istəkli oynayırlar, futbolçularım həvəslidilər.
İLKİN SULTANLI