“Gələcəyini dəqiq bilmirdik. Ona görə oyuna bir neçə saat qalmış elan verdik. İki gün öncə eşitdim ki, Məsut Şəkiyə gələcək, dini mədrəsənin qonağı olacaq. Rəhbərlikdən xahiş etdim, onlar da Özilin yardımçılarıyla əlaqə saxladı. Matça az qalmış futbolçu Şəkidə idi, onunla görüşdüm, dedi ki, stadiona gələcəm. Sonra elan paylaşmağa başladıq ki, Məsut da oyuna gələcək. Düzdü, düşünürdük ki, 3000 bilet satarıq, amma olmadı. Çünki həm hava tutqun idi, həm də adamlar inanmırdı. Amma stadionda 1500 nəfərə yaxın azarkeş oldu. Şəhid ailələrini, onların uşaqlarını və qaziləri biz dəvət etmişdik. Bəzilərini də biletsiz içəri buraxdıq. Amma daha çox divardan aşan, stadionun ətrafından içəri girənlər vardı. Azarkeşlərin bir hissəsi biletsiz keçməyi bacardılar. Komandaya xeyir vermək əvəzinə belə addım atdılar. Stadionda 472, sosial şəbəkələrdə 130 bilet satıldı. Ümumilikdə klub büdcəsinə 1202 manat daxil oldu. Məsut ilk yarı bitəndə gəldi. İstəyirdik ki, azarkeşlərlə danışsın və ikinci hissə başlayanda topa toxunuş etsin. Ancaq orda izdiham baş verdi, əlaqələndirməni itirdik və azarkeşlər stadiona axışmağa başladı. Belə durum narahatlıq doğurdu, hər kəs futbolçuya yaxınlaşdı. Məsut daha tez getməyə məcbur qaldı, bu üzdən ikinci hissədə topa toxunuş edə bilmədi. Azarkeşlərin də meydana girməsinə görə, yəqin ki, AFFA bizi cəzalandıracaq. Bir məqam da var ki, Özil həmişə gəlmir. Belə şeylər olur. Bilindiyi kimi, “Qarabağ”ın bazasına gəlişi əvvəlcədən bilinirdi, amma bura gəlməsi planda yox idi”.