“Bilindiyi kimi, ”“Qarabağ" güclü bənddi. Artıq Azərbaycan çempionatından daha üst səviyyədədi və düşünürəm ki, Avropada da bunu sübut edib. "Turan Tovuz" güclənib deməyək, daha da peşəkarlaşıb deyək. Bu da böyük pulların xərclənməsi ilə bağlıdı. Həm məşq prosesinə, həm də oyuna və Berdıyevin transferlərinə baxanda bunu görmək olur. Təbii, zaman lazımdı ki,  2-3 ilə komandanı gücləndirsin və “avrokubok zonası”na düşə bilsin. Düzdü, bu il də mümkündü.  Çünki Ayxan Abbasov da yaxşı komanda formalaşdırmışdı. "Araz-Naxçıvan"ın da inamlı çıxışını qeyd edə bilərəm. Komanda oyun üslubu ilə başqalarına başağrısı ola bilib, əbəs yerə 3-cü pilləyə yüksəlməyib. "Zirə" isə daim inkişafdadı. Bu da Rəşad Sadıqovun verilən vaxtdan səmərəli istifadə etməsinin nəticəsidi. Azərbaycanda ikinci "Qarabağ"  formalaşdığını deyə bilərəm. "Zirə"nin ümumi daxili struktura baxanda deyə bilərik ki, komanda böyüyüb. "Qarabağ" səviyyəsində olmasa da, artıq ona yaxın klub yaranır. Həm peşəkarlıq, həm də futbol baxımından komanda bu il daha aqressivdi, daha çox qol vəziyyəti yaradır. Təbii ki, bu da baş məşqçinin verilən vaxtı dəyərləndirməsinə görədi. Hər bir məşqçiyə zaman lazımdı. Orda iş varsa, deməli, 3-4 il sonra komanda uğur qazanacaq. “Zirə” bu il də ikincilik uğrunda mübarizə aparacaq.  "Sabah" hələ bağlı boxçadı. Çünki qeyri-sabit oynayır. Məsələn, "Kəpəz"lə oyunda birinci hissədə buraxdığı 2 və ikinci hissədə vurduğu 3 qol bunu göstərdi. Yekunda qalib gəlsələr də, etiraf edək ki, oyunun ən yaxşısı deyildilər. "Sarı-göylər" onlarla heç də pis döyüşmədi. Bu il "Səbail"in oyun fəlsəfəsi diqqətimi çəkir. Ötən il klubun büdcəsi bundan 3-4 dəfə çox idi, lakin indi daha aqressiv, dinamik və rəngarəng futbol oynayırlar. Hücumların bir yox, bir neçə istiqamətdə getdiyini izləyirik. "Səbail" artıq 14 qol vura bilib. Düzdü, çox qol da buraxırlar, yəqin yaxın gələcəkdə aradan qaldırarlar. "Qarabağ"la oyununu izləmişəm. Son vaxtlar “Qarabağ”la açıq futbol oynayan digər komanda tanımırdım. Adətən, digər rəqiblər ehtiyatlı oynayır. Amma "Səbail" açıq futbol oynayaraq "Qarabağ"a “dişini göstərdi”.  Hətta deyim ki, "Səbail"in qalib gəlmək şansı da var idi. "Şamaxı"nı isə bəziləri "sürpriz" adlandırar.  Çünki 8 oyuna 12 xal yığıblar. Ancaq mənim üçün bu nəticə sürpriz deyil. Çünki Ayxan Abbasovu yaxından tanıyıram, minimumdan maksimumu əldə edən məşqçidi. Tez bir zamanda komanda formalaşdıra bilir. Bunu həm “Turan Tovuz”da,  “Zirə”də, həm də “Sumqayıt”da göstərdi. "Qarabağ"la rəqabət apara biləcək komandalar var. Ancaq mən yenə də əminliklə deyə bilərəm ki, ağdamlılar bu il də sona 5-6 tur qalmış çempionluğu elan edəcək. Yaxın gələcəkdə "Zirə" və “Turan Tovuz” “Qarabağ”a “əlcək ata” bilər”.

“Yaxşı olmayanlara "Sumqayıt"ı aid edə bilərik.  Amma düşünürəm ki, komanda çətin dönəmi arxada qoyub. Samir Abasov düz yoldadı. Sadəcə, avrokubok və çempionat oyunları arasında fasilə az idi. Etiraf edək ki, Samir Abasovun ehtiyat oyunçular skamyası çox zəifdi. "Sumqayıt"a zaman lazımdı ki, futbolçular formasını bərpa etsinlər. Sözün açığı, "Neftçi"də durumun acınacaqlı olduğu görünür. Son oyunu stadiondan izlədim,  həqiqətən "ağ-qaralar" çox aciz görünürdü. Flaqmanı belə vəziyyətdə görmək hər kəsə ağırdı. Düşünürəm ki, "Neftçi"də köklü dəyişikliklər olmalıdı. Düşünürəm ki, Roman Qriqorçuk da "Neftçi"yə və öz imicinə görə komandanı tərk etdi. “Neftçi”yə yerli məşqçinin gəlməsini istərdim. Samir Abasovun "Sumqayıt"da olduğunu nəzərə alsaq, Tərlan Əhmədov komandanı bu durumdan çıxara bilər. Çünki özünü sübut edən məşqçilərdəndi. "Kəpəz"in durumu o qədər də ürəkaçan deyil. Son oyun göstərdi ki, komanda geridönüş edə bilər”.

“Düşünürəm ki, "Qarabağ"ın futbolçularının bir çoxunu qeyd etmək olar. Onlar həm texnikalıdı, həm də taktiki cəhətdən yaxşıdı. Bu sırada Olavio  Juninyo ilə Elvin Cəfərquliyevi xüsusi qeyd edərdim. Həqiqətən də klub üçün böyük işlər görürlər. Digər komandalardan isə Rüfət Abdullazadə, Xəyal Nəcəfov, Otto Con, Cordan Rezabala və Qismət Alıyevi qeyd etmək olar. Salifi Suma daha atletik, dinamik və aqressiv futboçudu. Müəyyən zaman əsas heyətdə yer tapmaması, təbii ki, Rəşad Sadıqovun onun böyüməsini istəməsi ilə bağlıdı. Yersiz vərəqələr alır, lazımsız hirs nümayiş etdirir. Rəfael Utziq də yaxşı oyun göstərir”.