“Xaricə getmək variantı hələ də qüvvədədi” – Rəşad Əzizli “Sumqayıt”ı seçməsinin səbəbini açıqladı
Xeyli müddətdi klubsuz qalan Rəşad Əzizlinin yeni iş yeri bəlli oldu.
Ötən mövsümün sonunda 1-ci liqaya düşdüyünə görə “Qəbələ”dən ayrılan qapıçı “Sumqayıt”la anlaşıb. Millimizin qapıçısı mövsümün sonuna qədər müqavilə bağlasa da, bir qədər gözlənilməz oldu. Əzizli son dəfə saytımıza açıqlamasında xaricə getmək planında olduğunu, son variant kimi yerli klublar üzərində dayanacağını bildirmişdi.
Görəsən, qolkiper niyə “Sumqayıt”a keçdi?
Rəşad transferi barədə “Football-plus.az”a açıqlamasında bu sözləri dedi:
“Xaricə getmək variantı hələ də qüvvədədi. Danışıqlar gedir, gözləyirik. Yəni hər dəqiqə hər şey ola bilər. Sadəcə, indiki zamanda "Sumqayıt" variantını dəyərləndirməliydim. Özüm üçün də lazım idi. Ona görə belə qərara gəldim ki, hazırda, indiki məqamda"Sumqayıt"da olum. Amma yenə də danışığımıza görə gələcəkdə hər şey ola bilər. Yəni xaricə də gedə bilərəm”.
30 yaşlı qapıçı Mehdi Cənnətovla rəqabət barədə nə düşünür?
“Mən heç vaxt rəqabətdən çəkinməmişəm. İndi də sağlam rəqabətdi. Kim necə olacaq, nə olacaq - hamısını zaman göstərəcək. Bu barədə danışmaq düz olmaz. Ümid edirəm ki, hər şey yaxşı olar”.
RÖYANƏ OĞUZ
Digər xəbərlər
