Superağır çəkidə boks üzrə sabiq mütləq dünya çempionu Mayk Tayson (50-6) 58 yaşında da rinqə çıxmaq istəyinin səbəbləri haqda danışıb:
"Football-plus.az" xəbər verir ki, o bu fikirləri səsləndirib:
“Pol ilə döyüşü, sadəcə, səbirsizliklə gözləyirəm. Bu döyüş içimdəki atəşi alovlandırır, mənə həyat verir. Etmək istədiklərimi edirəm. Qalan hər şeyi unudun. Başqalarının mənə qələbə və ya məğlubiyyət arzulaması önəmli deyil. Əsas odu ki, istədiyimi edə bilim. Həyat yoldaşımın və uşaqlarımın həmin an nə hiss etdikləri haqda düşünməyin. Sadəcə, mənlə olun və mənə yazığınız gəlməsin. Mənə görə narahat olmayın. Vəssalam”.
Xatırladaq ki, Tayson ilə Ceyk Pol (10-1) noyabrın 15-də Dallasdakı “AT&T” stadionunda üz-üzə gələcək. Həmin döyüş “Netflix”in canlı efirində göstəriləcək.