İngiltərə yığmasının sabiq baş məşqçisi Qaret Sautqeytin yeni iş yeri müəyyənləşib. Amma onun hansısa komandanın başına keçdiyini düşünməyin.

Sentyabrın 3-də 54 yaşını tamamlayacaq Sautqeyt bunda sonra UEFA-da çalışacaq. “Goal.com” portalının yaydığı xəbərə görə, ingilis mütəxəssis qurumun Texniki Müşahidəçilər Komitəsinin daimi üzvü olmağa razılaşıb. Qeyd edək ki, texniki müşahidəçilər oyunları məşqçi baxışı ilə dəyərləndirib statistik və video təhlili əhatə edən hərtərəfli hesabatların yaradılmasına cavabdehdilər. Onlara müşahidələr aparmağa kömək məqsədilə ən müasir vizuallaşdırma alətlərinə və məlumatlara çıxış imkanı verilir.

Xatırladaq ki, İngiltərə yığması bu yay Almaniyada keçirilən Avropa çempionatının finalında İspaniyaya 1:2 hesabı ilə uduzub. Sautqeytin 2016-cı ildən başçılıq etdiyi komanda bu turnirin 2021-ci ildəki finalında İtaliyaya əsas və əlavə vaxtı 1:1 hesabıyla bitən oyundan sonrakı penalti seriyasında da məğlub olub.