"Sabah" Misli premyer-liqasının 4-cü turunda evdə "Sumqayıt"ı məğlub etdi - 3:1.

"Football-plus.az" xəbər verir ki, "bayquşlar"ın baş məşqçisi Krunoslav Renduliç matçdan sonra keçirilən mətbuat konfransında jurnalistlərin suallarını cavablandırıb.

- Əvvəlcə, oyunçularımı təbrik edirəm. Onlar bu gün çox yaxşı oynadı və keyfiyyətli futbol sərgilədi. İlk saniyədən etibarən oyuna nəzarət etdik. Əfsuslar olsun ki, bir səhvlə hesabda geri düşdük. Ardıyca 10-15 dəqiqə özünəinamı itirdik. Birinci hissənin sonlarına qədər bir neçə qol epizodunu dəyərləndirə bilməsək də, nəhayət hesabı bərabərləşdirdik. İkinci hissədə isə iki qol vurduq. Bəzi epizodlarda daha tez ötürmə etsək, hesab fərqli ola bilərdi. Ümumiyyətlə, qələbəyə layiq idik. Çünki "Sumqayıt" bir və ya iki dəfə "çərçivə"yə zərbə endirə bildi.

- Ötən həftə "Neftçi"ni, bu gün "Sumqayıt"ı məğlub etdiz. Komanda daha çoxunu bacarmağa qadirdi?
- Əminliklə deyirəm ki, daha çoxunu edə bilərik. Bunun üçün addım-addım irəliləməliyik. Kahim Parris zədəlidi, Anatoli Nuriyev hələ tam formada deyil. Başqa futbolçular da var ki, daha yaxşısını edə bilər.

- Konfrans Liqasında mübarizəni dayandırdıqdan sonra premyer-liqada 6 xal qazanmısız. Futbolçuları psixoloji baxımdan toparlamaq nə dərəcədə çətin oldu?
- "Sent Patriks" jurnalistlərin zənn etdiyi kimi zəif komanda deyil. Biz hər iki oyunda azlıqda oynamışıqş "Başakşəhər" pley-offda 11 nəfərlə bu komandanı məğlub edə bilmədi. Yəqin bunu izah etmək sizin üçün çox çətindi.

- Belədə komandaların büdcəsi hansısa önəm daşımır?
- Çox önəmli faktorlar var. Hər şey büdcə deyil.

- Belə məqamlarda məşqçi işi ön plana çıxır. Buna misal olaraq, "Qarabağ"ı göstərə bilərik.
- ...

- "Qarabağ" məğlub edilməz deyil. Dünən "Turan Tovuz" bu rəqibi evində məğlub etdi. Həmin oyun sizin çempion olmağa iştahınızı artırdımı?
- Mən həmişə demişəm ki, uduzmayan komanda yoxdu. "Qarabağ" üçün həm Çempionlar Liqasında, həm də premyer-liqada çıxış etmək asan deyil. Dünən "Turan Tovuz" qələbəyə layiq oynadı. Qarşıda hələ çox oyun var. Hazırda "Kəpəz"lə matça köklənmişik. Hədəfimiz avrokuboklardı.

KƏNAN BAHADIR