“Belə baxıram ki, tək bizdə yox, bütün Avropada hakimlik geriləyir”

"Sabah"ın oyununda problemlər vardı. Əvvəlcədən də deyilmişdi ki, baş hakim  Marsel Birsan ölkəsində o qədər də yaxşı ad çıxarmayıb. Ruminiyalı referinin idarəçiliyinə həmişə iradlar olub. Bu oyunda da müşahidə edildi. Düzdü, verdiyi "qırmızı" tam düzgün idi. Çünki epizodda rəqibi aşkar qol vurmaq imkanından məhrum etmək vardı. Yəni əlavə heç bir sual ola bilməz. Ümumi götürəndə bəzi epizodlarda qonaqlara müəyyən güzəşt olunurdu. Ancaq oyunun yekun nəticəsinə təsir edə biləcək kobud səhvləri olmadı. Amma "Qarabağ", "Sabah", "Zirə", həm də "Sumqayıt"ın oyunlarında çox zəif hakimlik gördüm. Düzünü desəm, heç birini bəyənmədim. Belə baxıram ki, tək bizdə yox, bütün Avropada hakimlik geriləyir. "Qarabağ"ın səfərdə "Ludoqorets"lə oyununu "top-5" ölkənin hakimi o cür idarə edirsə, sözüm yoxdu. Baxmayaraq ki, "Qarabağ" 7:2 hesabıyla qalib gəldi, zəif hakimlik idi. İtaliyada həmişə güclü hakimlər yetişib. İstər FİFA, istərsə də UEFA-nın Hakimlər Komitəsinin sədri güclü italyanlardı. Amma o görüşün hakimi sanki istisna idi. "Sabah"ın görüşündəki hakimlik xoşagələn deyildi. Nəticəyə təsir edən kobud səhvi olmasa belə, yaxşı idarəçilik saymıram. O ki qaldı "Zirə"nin oyununa, avstriyalı hakim Yulian Vaynberger daha yaxşı təsir bağışladı.Verdiyi qərarlar yerində idi. Əl qeyri-təbii vəziyyətdə olduğuna görə "Osiyek"in qapısına düzgün penalti təyin etdi. "Osiyek"in tələb etdiyi penaltiyə gəlincə, uduzan komanda həmişə narazı olur. O epizodu təkrar göstərmədilər. Şübhə ola bilərdi, amma VAR da müdaxilə etmədisə, deməli, olmayıb".