Klublarımızın avrokubok həftəsində AFFA tərəfindən çempionat matçının təxirə salınmasına əvvəlki illərdə tez-tez rast gəlinirdi.

"Football-plus.az" xəbər verir ki, son illərdə ölkəmizdə bu praktikadan istifadə halları azalıb. Bu mövsüm yalnız “Sabah”ın “Partizan”la oyunlarının arasına təsadüf edən çempionat matçı təxirə salınmışdı. Avropada isə bu praktika indi-indi sürət yığmağa başlayır. Ya biz tez ayılmışıq, ya da Avropadakılar gec ayılıb. Düzdü, bu, “böyük beşlik” ölkələrinə aid deyil. Amma “ikinci eşelon” , eləcə də Norveç, Polşa kimi ölkələr bu baxımdan seçilməyə başlayıb. İş o yerə çatdı ki, Türkiyə klublarının bütün rəqiblərinin həftəsonu çempionat oyunları təxirə salındı. “Qalatasaray”ın rəqibi “Molde”nin bu həftə “Vikinq”lə keçirməli olduğu görüş sentyabrın 30-na keçirilib. “Beşiktaş”ın rəqibi Kiyev “Dinamo”sunun da bazargünkü “Veres”ə qarşı oyunu qeyri-müəyyən müddətə təxirə salınıb. “Fənərbaxça”nın rəqibi “Tvente” bazar günü erediviziyada “Vitess”lə qarşılaşmalıydı. Amma həmin oyun sentyabrın 27-nə keçirilib. Eləcə də “Adana Dəmirspor”un rəqibi “Genk”in bazar günü “Brügge”yə qarşı keçirməli olduğu çətin oyun da qeyri-müəyyən müddətə təxirə salınıb. Təbii ki, bütün bunlardan sonra diqqətlər Türkiyə Futbol Federasiyasına yönəldi. Türkiyə üçün indi hər əmsal böyük əhəmiyyət daşıyır. Pley-off mərhələsi isə elə bir yerdi ki, səhvə yol vermək olmaz. Düzdü, ÇL-in pley-offunda oynayan “Qalatasaray” lap “Molde”yə məğlub olsa belə, mübarizəni AL-in qrup mərhələsində davam etdirəcək. Amma qalan üç klub KL-in pley-offunda oynayacaq. Rəqibini keçə bilməyən komanda üçün bu mövsümlük avrokubok macərası başa çatacaq. Ona görə də TFF hər 4 klubla məsləhətləşərək və onların razılığını alaraq həftəsonu keçirəcəkləri oyunları təxirə salıb. Amma ümumilikdə 4 yox, 3 oyun təxirə düşüb. Belə ki, “Adana Dəmirspor”la “Beşiktaş” həftəsonu bir-biri ilə qarşılaşmalıydı. Beləliklə, 3-cü tur çərçivəsində həm bu oyun, həm də “İstanbulspor” – “Qalatasaray”, “Fənərbaxça” – “İstanbul BŞ” görüşləri qeyri-müəyyən müddətə təxirə salınıb. Oyunların yeni tarixi ilə bağlı məlumat daha sonra TFF tərəfindən veriləcək.

Yeri gəlmişkən, bir xəbəri də diqqətinizə çatdıraq. Bu mövsüm hələ ki rəqib tanımayan və keçirdiyi 6 rəsmi oyunun hamısından qələbə ilə ayrılan “Fənərbaxça”ya UEFA-dan pis xəbər gəlib. İstanbul nəhəngi növbəti həftə Enshededə “Tvente”yə qarşı keçirəcəyi cavab oyununda azarkeş dəstəyindən məhrum olacaq! UEFA bundan əvvəlki mərhələdə “Maribor”a qarşı cavab oyununda tribunada baş verən və görüşün təxminən yarım saat dayanmasına səbəb olan olaylara görə “Fənər”ə avrokuboklarda 1 səfər oyununu azarkeşsiz keçirmək cəzası verib. Halbuki həmin vaxt tribunada yaşananların əsasını sloveniyalı fanatlar qoymuşdu. Bundan başqa, “sarı-lacivərdlilər”ə 30 min avro cərimə kəsilib. Eləcə də komanda 30 gün ərzində “Maribor“la əlaqə quraraq stadiona dəymiş ziyanı qarşılamalıdı! Sloveniya təmsilçisi isə canını yalnız 40 min avroluq para cəzası ilə qurtarıb.