Bu gün AFFA İntizam Komitəsinin iclası keçirilib.

"Football-plus.az" xəbər verir ki, iclasda Misli premyer-liqasının 2-ci turundakı qayda pozuntuları ilə bağlı qərarlar qəbul edilib:

“Qarabağ” – “Kəpəz” oyununda “Kəpəz”in 4 futbolçusu sarı vərəqə aldığına görə klub 700 manat cərimələnib. Eyni oyununun 78-ci dəqiqəsində “Kəpəz”in 8 nömrəli futbolçusu Elmir Tağıyev ikinci sarıdan qırmızı vərəqə aldığına görə 1 oyun cəzalanıb, Gəncə təmsilçisi 500 manat cərimələnib. Sözügedən görüşün 89-cu dəqiqəsində “Kəpəz”in azarkeşləri tərəfindən kütləvi şəkildə hakimlərin ünvanına təhqiramiz ifadələr səsləndirildiyinə və bu hal cari mövsümdə ilk dəfə yaşandığına görə “Kəpəz”ə xəbərdarlıq edilib.

“Araz-Naxçıvan” – “Şamaxı” oyununda hesab tablosu işləmədiyinə görə “Araz-Naxçıvan” klubu 500 manat cərimələnib.

“Səbail” – “Neftçi” oyununda “Səbail”in 5 futbolçusu sarı vərəqə aldığına görə klub 700 manat cərimə edilib. Həmin matç bitdikdən sonra stadionda “Neftçi” klubunun azarkeşləri tərəfindən iğtişaş törədildiyinə görə Bakı klubu 4000 manat cərimələnib. Sözügedən oyun bitdikdən sonra “Neftçi”nin 99 nömrəli futbolçusu Ervin Koffi azarkeşlərə kənar əşya atdığına görə 2 oyun cəzalanıb, klubu isə 2000 manat cərimə edilib.

“Turan Tovuz” – “Sumqayıt” oyununda “Turan Tovuz”un 4 futbolçusu sarı vərəqə aldığına görə klub 700 manat cərimə edilib.