“Sabah”ın oyununda siyası təxribat ola bilər! – klub hərəkətə keçdi
“Sabah”ın “Makkabi” ilə matçı ətrafında xoşagəlməz hallar yaşana bilər.
Belə ki, bəzi azarkeşlər sosial şəbəkələrdə stadiona Fələstin bayrağıyla gələcəyini yazır, həmçinin başqalarını da buna çağırır. Maraqlıdı ki, çağırışa müsbət cavab verənlərin sayı artmaqdadı. Səbəb isə aydındı: İsrail – Fələstin münaqişəsi. HƏMAS-ın siyasi qanadının lideri İsmayıl Haniyənin bu gün səhər saatlarında Tehranda öldürülməsi münaqişəni daha da qızışdırıb.
Əlbəttə, tərəfdarların bu istəyi “Sabah”ın ciddi problemlə üzləşməsinə səbəb ola bilər. Çünki UEFA-nın mövqeyi bəllidi. Hansısa oyunda siyasi təxribat baş verərsə, məsuliyyət daşıyan kluba qarşı ciddi sanksiyalar tətbiq edilirsə, müəyyən cəza tədbirləri görülür.
Bəs “Sabah”ın planı nədi? Klub Fələstin bayrağının stadiona keçirilməsinə icazə verəcəkmi?
“Bayquşlar”ın mətbuat xidmətinin rəhbəri Elnur Həmidov “Football-plus.az”un sualını cavabladı:
“Bilindiyi kimi, UEFA-nın bayrağı altında keçirilən oyunlara başqa ölkələrin bayraqlarının gətirilməməsiylə bağlı konkret qərar var. Belə təşəbbüslər məhz qurumun qanunlarına uyğun tənzimlənir. Bu üzdən oyun günü UEFA-nın tələblərinə uyğun addım atılacaq”.
Qeyd edək ki, oyun sabah 20.00-da başlayacaq.
Digər xəbərlər
