“FİF şimal bölgəsinə səfərdən əvvəl bizi dəvət etmişdi. O zaman FİF-in rəhbərliyi ilə görüşdük. Klubun maliyyə qaynaqları, ev oyunlarını keçirdiyi stadion, çətinliklər barədə ətraflı məlumat aldılar. Daha sonra onların şimal bölgəsinə səfəri nəzərdə tutulmuşdu. Bu görüş çərçivəsində də Qubanın icra başçısıyla görüşüblər və “Hypers”in bundan sonra oranı təmsil edəcəyi anlaşılıb. Xaçmazda da bizim işitirakımızla icra başçısıyla görüş keçirildi. Bundan əvvəl “Şimal” çempion olarkən biz icra başçısıyla görüşmüşdük. Bu üzdən də artıq icra başçısı çətinliklərimizlə tanış idi. Bu dəfə bir yerdə müzakirə olundu. Əlbəttə, əsas məsələ stadiondu. Yəni necə etmək lazımdı ki, “Şimal” ev oyunlarını Xaçmazda keçirsin. Bilindiyi kimi, burda yalnız bir stadion var - Xaçmaz Olimpiya İdman Kompleksinin stadionu. Həmin stadionda hər şey qaydasındadı, sadəcə, ot örtüyü bərbad vəziyyətdədi. Orda gündə üç növbə əsasında azyaşlılar məşq etdiyindən toz-torpaqdı. Elə uşaqlarımızın orda məşq etməsi belə acınacaqlıdı. Əsasən bu məsələ ilə bağlı müzakirələr aparıldı. Həmçinin yollar fikirləşildi ki, ən azı ot örtüyü dəyişdirilsin və ya süni örtüklü meydança salınsın. İcra Hakimiyyətinin başçısı da bildirdi ki, artıq bununla bağlı AGİN-ə müraciət olunub. Ancaq hələ ki məsələnin yaxın müddətdə həll olunacağı ilə bağlı konkret cavab yoxdu. FİF-in rəhbəri Tural Piriyev də mövzuyla bağlı bir sıra ideyalar irəli sürdü. Bunlardan biri də investor cəlb etmək idi. Lakin belədə ortada konkret heç nə yoxdu. Bakıya qayıdandan sonra FİF bu məsələylə bağlı araşdırma aparıb, öz variantlarını, layihələrini irəli sürəcək. İkinci məsələ klubun maliyyə qaynaqları idi. Bilindiyi kimi, FİF bir sıra bölgələrdə - Zaqatalada, Tovuzda, Gəncədə layihələr həyata keçirib. Məsələn, Zaqatalada biznes- klub yaradılıb, yerli sahibkarlar cəlb olunub və onlar “Zaqatala”nın ayaqda qalması üçün hər il müəyyən qədər ianə edirlər. Görüş zamanı həmin ideya da ortaya sürüldü. Amma Xaçmazda bu da çətin görünür. Ev oyunlarımızı Xaçmazda keçirmirik və burdakı bir çox sahibkar rayonun belə komandası olduğundan bəlkə də xəbərsizdi. Çünki ev oyunlarımızı Siyəzəndə keçiririk. Yalnız son - final oyunumuz “CBC Sport”da canlı yayınlananda bildilər ki, Xaçmazda belə komanda var. Bu üzdən də FİF-in xəttiylə bizə cəlb edilə biləcək bütün maliyyə dolayısıyla stadionla bağlıdı. Yəni Xaçmazda oynasaq, onların da imkanları çox geniş olar. Önəmlisi odu ki, “Şimal” növbəti mövsümdə 2-ci liqada çıxış edəcək. Klub adından FİF-ə təşəkkür edirik. Görünən odu ki, onlar komandamızın dayanıqlı maliyyə ilə təmin olunması üçün səy göstərirlər. Eyni zamanda Xaçmaz rayon icra hakimiyyətinin başçısı buna çox müsbət yanaşdı. Oyunlarımızı Xaçmazdakı stadionda keçirəcəyiksə, bütün matçlarımızda iştirak edəcəklərini bildirdilər. İstənilən halda 2-ci liqada çıxış edəcəyik. Ötənilki sponsorumuz yenə eyni maliyyəni qarşıdakı mövsüm üçün də ayıracaq. Bir də dövlət proqramı çərçivəsində ayrılan vəsait var. Nəzərdə tutduğumuz xərclərin təxminən 60-70 faizi qarşılanıb. Qalan məbləğ üçün isə daha bir sponsorun cəlb edilməsi yönündə çalışmalar gedir. Qarşıdakı “futbol ili” üçün çempionluğu hədəfləməmişik. Vacib olan 2-ci liqada möhkəmlənməkdi. Yəni ən azı ilk “8-lik”də yer almaq üçün çalışacağıq. Ötən mövsüm Region Liqasında çempion olan heyətimizi, demək olar ki, qorumuşuq”.