Qadın futbolçulardan ibarət yığmamız sabah Avropa çempionatının seçmə mərhələsi çərçivəsində Macarıstanla qarşılaşacaq.

"Football-plus.az" yığmanın baş məşqçisi Siyasət Əsgərovun oyunöncəsi fikirlərini öyrənib.

- Hazırda futbolçuların fiziki durumu nə yerdədi?
- Ayın 1-də toplaşmışıq. Düzdü, Rusiya və Qazaxıstandan olan qızlar həmin vaxt bizə qoşula bilmədi. Ona görə də digər milli komandanın bəzi oyunçuları bizim nəzarətimizdə olduğuna görə onlardan dəvət etmişdik. Şükürlər olsun ki, məşqlərimiz yaxşı keçdi. Qızlarımızın çoxu Türkiyədə oynayır. Orda son oyun ötən ayın 5-də olub. Liqa davam etmədiyinə görə komandanın durumu yaxşı deyildi. Düşünürəm ki, indiki vaxtda milli komandalar çox problem yaşayacaq. Çünki çempionatlarda fasilədi. Bizim də oyun praktikası baxımından geriləməmiz olacaq. Buna baxmayaraq, indiki durumda komandanın fiziki durumunu qaldıra bilmişik. Zədədən qorxduğumuz üçün öz aramızda bir yoldaşlıq oyunu oynadıq. Yalan deyərəm ki, yığma oyuna tam hazırdı. Amma çalışdığımız qədər hazırlaşmışıq.

- Macarıstanla səfər oyunundan bir xalla qayıtdız. Bakıda keçiriləcək matçda qarşıya qoyulan hədəf nədi?
- Macarıstandakı 1 xal bizim üçün çox önəmli idi. B səbətində ilk oyunumuz idi və Macarıstan kimi komandaya qarşı oynayırdıq. O matçda yığma 1 xal üçün əlindən gələn hər şeyi ortaya qoymuşdu. Ayın 12-dəki oyunda da hədəf xal ilə çıxmaqdı. Amma bu 3 xal olarsa, bizim planlama ilə davam edərsə, bu qrupu 2-ci yerdə bitirmək şansımız var. O halda C səbətinə düşməyəcəyik. Buna görə əsas məqsədimiz oyundan maksimum xal ilə ayrılmaqdı.

- Rəqibin əsas üstünlüyü nələrdi?
- Çox keyfiyyətli komandadı və yaxşı futbolçulara sahibdi. Belə turnirlərdə neçə illərdi oynayırlar. Oyun praktikaları yüksəkdi. İllərdi B səbətindədilər. Hətta A səbəti üçün pley-offda oynayıblar. Doğrudan da, Macarıstan çox yaxşı rəqibdi. Evdə İsveçrəni də 1:0 məğlub edib. Bunlar göstərir ki, onlar heç də İsveçrədən zəif deyil.

- Qrupdan çıxmaq şansınızın olduğunu düşünürsüz?
- Qrupdan çıxmaq üçün mücadilə edirik. Milli komanda olaraq tarix yazmışıq və daha bir tarix yazmaq istəyirik. Onun üçün bütün şansımızı sınayırıq ki, qrupdan çıxıb, pley-offa gedək. Bu, futbolumuz üçün yenilik olar. “Niyə də yox?!” deyirik. 12-də xal qazanacağımız təqdirdə şansımız çoxalır. İnşallah, bunun üçün əlimizdən gələn hər şeyi edəcəyik.

- "Sabah"ın oyunçusu Xanım Əsədova da yığmaya qoşuldu. Bunu zəruri edən nədi ? Hansı səbəbdən çağrıldı?
- Ayın 1-dən elit məşqlərə qoşulmuşuq. Rusiya və Qazaxıstanda olan futbolçuların yerinə aşağı yaş qruplarında olan istedadlı qızları dəvət etmişdik. O qızlar arasında Xanım Əsədova bir qədər seçilirdi. Bu oyunda Manə Mollayeva və Pəritan Bozdağ iki sarı vərəqə aldığına görə iştirak etməyəcək. Ona görə Xanımı dəvət etdik. Bu, Xanım üçün stimul olacaq.

- Eyni zamanda yığma üzvlərinin əvvəlki oyunlardakı qələbəyə görə mükafatlarını ala bilmədiyi, buna görə futbolçuların AFFA-dan narazı qaldığı deyilir. Bu barədə nə deyə bilərsiiz?
- Futbolçuların federasiyadan heç vaxt narazı qalacağını düşünmürəm. Doğrudan da, rəhbərlik bizim və qızların yanında olur. Əksər matçlarımızda tribunada olurlar. Qızlarla görüşlərində də yanlarında olduğunu bildirirlər. Müəyyən səbəblər ola bilər. Bildiyimiz kimi, federasiyada dəyişikliklər oldu. Məncə, bu mövzuda qızların narazılığı olmayıb.

GÜNAY SÜLEYMANOVA