Milli Hokkey Liqasının (MHL) mətbuat xidməti 2023/24 mövsümünün iki rəmzi komandasını açıqlayıb.

İlk rəmzi komandanın heyəti belədi: qapıçı – Konnor Hellibak (Vinnipeq); müdafiəçilər – Kuinn Hyuz (Vankuver), Roman Yosi (Neşvill); hücumçular – Neytan Makkinnon (Kolorado), Artemi Panarin (Reyncers), Nikita Kuçerov (Tampa-Bey).
İkinci yığmanın heyəti: qapıçı – Tetçer Demko (Vankuver); müdafiəçilər – Keyl Makar (Kolorado), Adam Foks (Reyncers); hücumçular – Filip Forsberq (Neşvill), Konnor Makdevid (Edmonton), David Pastrnyak (Boston).

Maraqlıdı ki, “Vaşinqton”un hücumçusu Aleksandr Oveçkin səsvermə zamanı heç kimin yadına düşməyib. O, sol cinah hücumçusunun seçimində bir səs də almayıb. Oveçkin karyerası boyunca 12 dəfə mövsümün rəmzi yığmasına düşüb – 8 dəfə birinci, 4 dəfə ikinci yığmaya. 2005-ci ildən bəri “Vaşinqton”un şərəfini qoruyan rusiyalı ulduz müntəzəm çempionatın son mövsümündə keçirdiyi 79 oyunda 31 qol vurub, 34 məhsuldar ötürmə verib. “Kepitalz”ın kapitanı pley-offda keçirdiyi 4 oyunda heç nə ilə yadda qalmayıb. “Vaşinqton” Stenli kuboku uğrunda mübarizənin elə ilk mərhələsində “Reyncers”ə 0:4 uduzmaqla mübarizəni dayandırıb. Ümumiyyətlə, MHL karyerası boyunca 853 qol vuran Oveçkin rekordçu Ueyn Qretskidən 41 qol geri qalır.