“Futbolçuların komanda dəyişməsi normal haldı. Ola bilməz ki, komanda həmişə eyni oyunçu ilə yola davam etsin. Təcrübə onu göstərir ki, “Qarabağ”dan gedən peşman olursa, qalan qazanır. Fikrimcə, futbolçular gedənlərin taleyinə baxıb, sonra qərar verməlidi. Kimisi pul dalınca gedir, kimisi Azərbaycanda oynamaqdan bezir. Çünki onlar dolu tribuna qarşısında ayda bir və ya iki dəfə oynayır. Praktikada da var ki, gedənlərin yerinə daha yaxşılar gəlir. İndi kimin getməsi və ya qalması barədə danışmaq tezdi. Ona görə ki, legioner limitinin dəyişdirilməsi məsələsi gündəmdədi. Bu halda seçim yaranır. Limit dəyişməcəyəksə, Amin kimi yerli qapıçıya ehtiyac var. Bu, istənilən klub üçün həm də üstünlükdü. Hər halda, məşqçilər korpusu özü bu barədə yekun qərar verəcək. Tibbi personal yaxşı bilir ki, hansı futbolçu necə formadadı. Yəni onlar da kimlərin “Qarabağ”ın standartlarına növbəti mövsümdə də cavab verəcəyindən xəbərdardı. Limit dəyişsə, Bədavi də, Maksim də gedə bilər. Məncə, “Qarabağ”ın məşqçiləri bu qərarı gözləyir. Limit dəyişdikdə yerli futbolçulara da komanda tapmaq çətin olacaq”.

“Uğurun başqa üzü də heyəti dəyişməkdi. Uğur varsa, futbolçular da dəyişir. Yəni Avropa miqyasında da kasıb klubların buna üstünlük verdiyini görürük. Əksinə, sevindirici haldı. Yəni futbolçulara maraq hardan qaynaqlanır, diqqəti necə cəlb edib? Bəli, ancaq sevinmək olar. Nəinki “Qarabağ”, başqa komandalarımız da futbolçu satışından nə qədər çox pul qazansalar, bir o qədər yaxşıdı. Qurban Qurbanov böyük təcrübə sahibidi. Nə etməli olduğunu yaxşı bilir. Məncə, istənilən oyunçuya alternativ biri axtarılır. “Köhlən atlar” hər cür vəziyyətə hazırlıqlı olur. Əlbəttə, bütün məşqçilər öyrəşdiyi, potensialına bələd olduğu futbolçularla yola davam etmək istəyər. Oyunçulara baxsaq, bəzilərinin gedişi heç nəyi dəyişməz. Məsələn, Leandro Andrade getsə, daha yaxşısı gələr. Lunyov da elə qapıçı deyil ki, ondan ikiəlli yapışasan. Məsələn, Kadi gedəndə bilinirdi ki, onu əvəzləmək çətin olacaq. İndi onun geri dönəcəyiylə bağlı xəbərlər yayılıb. Nə dərəcədə real olduğunu bilmirəm, amma gəlsə, sevinərəm. Çünki “Qarabağ” Borgesin komandasıdı. Hara gedir-getsin, burdakı kimi oynaya bilməyəcək. “Qarabağ”da elə futbolçu varmı ki, yerini doldurmaq ağır olsun? Biri ən yaxşılardan olan Yankoviç, o biri isə Juninyodu ki, belələrini tapmaq çətindi. Bu iki oyunçu getsə, “Qarabağ”a zərbə olar. Qalanlar isə əvəzedilməz deyil”.