Misli premyer-liqasının 29-cu turunda məhsuldar oyuna şahidlik etdik. “Qarabağ” evdə "Səbail"ə qalib gəldi – 4:2.

"Football-plus.az" olaraq, oyundan sonra "dənizçilər"in yarımmüdafiəçisi və bombardiri Pedro Nunoyla söhbətləşdik.

- Oyunun əvvəlində meydanda daha istəkli "Səbail" var idi. İkinci hissədə bunun əksini gördük. Güc fərqinin özünü göstərdiyini düşünə bilərik?
- Bizim üçün ağır matç oldu. Onlar nəyə görə çempion olduqlarını göstərdilər. 2 qol vurduq, amma bu, qələbə üçün bəs etmədi. Bəzi epizodlardan yararlana bilsəydik, nəticə fərqli olardı. Əlbəttə, “Qarabağ”ın gücü hər kəsə bəllidi.

- Hazırda vəziyyət elədi ki, bütün komandaların "Qarabağ"dan çəkindiyi iddia olunur. Bu fikirlə razısız?
- Əsla belə düşünmürəm. Həmişə olduğu kimi, bu dəfə də əlimizdən gələnin ən yaxşısını etməyə çalışdıq. Nəzərə alaq ki, məşqlərimizin olduğu və oyunları keçirdiyimiz "ASCO Arena" süni ot örtüklüdü. Bu üzdən bəzi çətinliklər olur. Amma bu, o demək deyil ki, kimdənsə çəkinirik ("dənizçilər"in baş məşqçisi Şahin Diniyev oyunsonrası mətbuat konfransında komandasının "Qarabağ"dan çəkindiyini bildirib – R.O.). Meydana sona qədər mübarizə aparmaq üçün çıxırıq və belə də edirik.

- "Səbail" turnir cədvəlinin 7-ci pilləsinə endi. Mövsümün sonu üçün hədəflər nədi?
- Növbəti 7 oyunda qələbə qazanıb ilk "beşlik"də olmaq istəyirik. Bunun üçün bütün gücümüzdən istifadə edəcəyik. Bizdən istənilən budu.

RÖYANƏ OĞUZ