“Məncə, yenə əcnəbi baş məşqçi gətirəcəklərsə, qalsın. Arif müəllim vaxtilə "Neftçi"nin əvəzedici heyətində çox yaxşı işləyirdi.

İndi də milli komandamızın heyətinin tam gəncləşdirilməsinin tərəfdarıyam. Bu heyətlə qarşıya ciddi məqsəd qoya bilmiriksə, 16-17-18 yaşlı gənclərə şans verilsin. Onlar da uduza-uduza təcrübə toplasın. Belə gənclərlə də Arif müəllim əla işləyə bildiyini göstərib.

Yox, qarşıya Avropa və dünya çempionatlarının final mərhələsinə vəsiqə qazanmaq məqsədi qoyulcaqsa və bir əcnəbi məşqçi bu yükün altına girəcəksə, kimi istəyirlərsə, gətirsinlər. Amma ağılla, vicdanla təyinat olacaqsa, Elxan Məmmədovun dövründəki kimi ayağının altı qazılmayacaqsa, onda milli komandanı çalışdırmağa ən layiqli məşqçi Qurban Qurbanovdu. Qurban Qurbanovdan sonra milli komandamızın baş məşqçisi kimi görmək istədiyim ikinci isim Rəşad Sadıqovdu. Onda millinin futbolçularını toparlayacaq, döyüşkən komanda yaradacaq xarakter, xarizma var. Amma biz boş-boş danışırıq, yazırıq, yekunda milyonlar verilib lazımsız əcnəbilər gətirilir, ölkənin büdcəsi dağıdılır, futbolun inkşafı üçün xərclənməli olan vəsait futbolumuzun məhvinə sərf edilir. AFFA-nın yeni rəhbərliyində təmsil olunacaq adlara baxanda, bir-ikisi istisna olmaqla, ümidverici heç nə görmürəm. Baş məşqçi məsələsində də, sonda yəqin ki, İşçi qrupun rəhbəri Elşad Nəsirov hansı əcnəbini istəsə, onu da gətirəcək”.