Bildiyiniz kimi, 2022-ci il iyulun 2-də Azərbaycan İdman Jurnalistləri Federasiyasının təsisçi üzvlərinnin və İdarə Heyətinin birgə iclası keçirilmişdi.

Səsvermə nəticəsində qərara alınmışdı ki, bundan sonra qurum Azərbaycan İdman Jurnalistləri İctimai Birliyi adlandırılsın və müvafiq sənədlər Azərbaycan Respublikası Ədliyyə Nazirliyinə göndərilsin. Həmçinin idarə heyətinin üzvlərinin sayı 11-ə çatdırılıb. Məhz həmin iclasda ARB24 televiziyasının əməkdaşı Azər İsmayıl qurumun yeni sədri seçilib.

Amma Azərbaycan İdman Jurnalistləri İctimai Birliyinin fəaliyyəti görünmür. Bizdə olan bilgiyə görə, Azər bəy sədrlikdən getməyə, idarə heyəti isə qurumu buraxmağa hazırlaşır. “Football-plus.az” bu məsələyə aydınlıq gətirmək üçün AİJ İB-nin sədri Azər İsmayılla əlaqə saxlayıb: “Azərbaycan İdman Jurnalistləri İctima Birliyi ilə bağlı hələlik nəsə demək çətindi. Onu deyə bilərəm ki, bəli, ortada fəaliyyətsizlik var. Amma ara-sıra müəyyən layihələrdə görünməyə çalışırıq. Təbii ki, bu da məni və idarə heyətini qane etmir. Biz daha sistemli və daha böyük təşkilat olmaq iddiasıyla yola çıxmışıq. Təbii ki, belə durum nə bizi, nə də həmkarlarımızı qane edir. Bunun da səbəbləri uzun və dərindi. Sədrlikdən ayrılmağımla bağlı nəsə desəm, doğru olmaz. Bu məsələ idarə heyətində müzakirə olunacaq. Eyni zamanda hüquqi proseslərə baxılacaq. Amma belə istəyim var. Bu tam olaraq sədrlikdən gedəcəyim demək deyil. Bunula bağlı hələlik həm özüm düşünürəm, həm də idarə heyəti ilə müzakirələrimiz olmalıdı. Təşkilatın özünü buraxması isə gündəmdə deyil. Təşkilatın yaşayacağını düşünürəm”.

ƏSƏD SEYİDOV