Bu gün Misli premyer-liqasında 3-cü dövrənin sonuncu turuna start verilib. 27-ci tur “Neftçi” – “Səbail” oyunuyla başlayıb.

Bu matç “CBC Sport”un efirində canlı yayınlanıb.

Misli premyer-liqası
3-cü dövrə, 27-ci tur
Neftçi - Səbail 3:0
Nir Bardea, 25 (ö.q.), Azər Salahlı, 27, Yeqor Boqomolski, 86
“Neftçi”nin bu rəqiblə ev oyunlarının balansı: 13+10=2-1, 29:8.
2017/18 - 2:0, 3:1; 2018/19 - 4:0, 1:2; 2019/20 - 2:1, 1:1; 2020/21 - 2:1, 4:0; 2021/22 - 1:0, 2:0; 2022/23 - 3:1, 3:0; 2023/24 – 1:1.
Cəzalı: yoxdu.
“Futbol+”in proqnozu: 40-30-30.
Bakı. “Neftçi Arena”. Saat 19.00.

“Neftçi” çətin dönəmdən keçir. Gah udan, gah da uduzan “ağ-qaralar” sabit nəticələrdən uzaq düşüb. Belədə nə rəqiblərlə aradakı xal fərqi faydalı yöndə artıb, nə də ilk “dördlük”dəki yer möhkəmləndirilib. Durum komandanı daha ciddi çıxış etməyə və səmərəli nəticələr qazanmağa vadar edir. Bojoviç uğrusuzluqlara bəhanə axtarmaq əvəzinə qələbələr üçün vacib səbəblərə köklənməlidi. “Forza Neftçi”nin klubu boykot etməsi də nəzərə alınmalıdı. Azarkeş qrupunun verdiyi vaxtdan artıq bir həftə ötür və bakılılar sonuncu matçda qələbə qazana bilmədi. İndi 3 xal əldə edilməlidi ki, növbəti sınaqlar üçün motivasiya yaransın. Elə bu yolla azarkeşlərlə “sülh imzalamaq” da asanlaşacaq. Yoxsa ikinci yer uğrunda mübarizədə iddianı qorumaq çox çətin görünür.

“Səbail”in ab-havası qənaətbəxşdi. “Dənizçilər” turnir cədvəlindəki ciddi sıxlıq şəraitində ləngərləyir. Lakin hələ də avrokuboklara vəsiqə qazanmaq üçün namizədlər sırasındadı. Bu şansı artırmağın yolu isə “Neftçi”ni məğlub etməkdən keçir. İş orasındadı ki, komanda bəzən yaxşı oyunla xal itirir. Bu çatışmazlığı yoluna qoymaq və həlledici məqamlarda daha sərrast çıxış etmək vacibdi. Hər halda, Şahin Diniyev komandasıyla birgə Avropaya yollanmaq istəyirsə, bu problemi aradan qaldırmalıdı. Çətin bu rəqiblə oyunda məqsədə çatmaları sual altındadı. Çünki “Səbail”in “Neftçi” ilə oyunlardakı statistikası ürəkaçan deyil.

Bu komandalar indiyə qədər 25 dəfə üz-üzə gəlib, 18-də “Neftçi”, 2-də “Səbail” qələbə qazanıb. 5 matçda hərəyə 1 xal düşüb.Topların nisbətində “ağ-qaralar” əzici üstünlüyə sahibdi – 55:16.

KƏNAN BAHADIR